ترقيع البكارة, موضوع هلكت حتى اكتبه

بالبداية احب اشكر كاظم لان تعبته وياية بتنقيح هذا الموضوع ..........





هلو شباب.........

موضوعي اليوم اكثر من حساس ..........نادر النقاش عنة........بيه مشاكل كثيرة والتكتم عليهة بعد اكثر واكثر........الموضوع هو عملية ترقيع البكارة.........



بروسيجر العملية؟
وين يسووهة؟
منو يكدر يسويهة؟
تكلفة العملية ومتطلباتها و مضاعفاتها؟
ليش ديسووهة؟
المشاكل الاجتماعية الناتجة عن وجود البكارة او عدم وجودهة ؟
المجتمع الشرقي والبكارة؟
روابط لمواقع عالمية معتمدة واحصائيات خاصة بالموضوع......يعني كلة موثق ومحسوب...





بروسيجر العملية...........

هاي العملية من اقدم العمليات بتاريخ البشرية........من ايام الامبراطورية الرومانية كانو يسووهة للجواري حتة يبيعوهم باغلى من سعرهم ويدعون بان الجارية عذراء........مرت العملية بثلاث مراحل تطور ........بزالازمنة القديمة كانت العملية ببساطة يستعملون خيط حرير يربطون بيه الجدار الخلفي للمهبل وية الامامي ببساطة وعند الجماع راح يتمزق نسيج المهبل وينزل الدم ........هاي ابسط طريقة واقدمهة.........استمر العمل بيهة للسبعينيات من هذا القرن........المرحلة الثانية كامو يستخدمون انسجة من حيوانات وهذا اكتشاف ياباني بالمناسبة ........مثلا جلد الضفدع او حوصلة المعزة .........يعني نسيج مشابه ........زينوكرافت.........وهاي العملية احسن من الاولى لان الالم والنزيف بيهة اقل من اقرب للحقيقي لان الاولى يجوز الخيط يكون عميق ويسوي نزيف مميت .......بس هالعملية بيهة عيب انه الزرع الاصطناعي راح يرفضة جهاز المناعة وراح يتاكل ويطرحة الجسم ورة فترة اسبوع شوية اكثر شوية اقل.........فيعني لازم يسووه قبل يوم او يومين من الجماع...........المرحلة الثالثة........هالبروسيجر فرنسي بالكامل ملوك التجميل.........كامو ياخذون نسيج من جدار المهبل الاصلي للشخص نفسة..........وينقلوه لمكان الغشاء ويخيطوه بخيط موقت يوكع ورة اسبوع ويبقة الغشاء.......هالطريقة دائمة ومتنكشف الا بالفحص الطبي.........نسبة نجاح العملية 98 بالمية حسب احصائات عالمية راح انطيكم الروابط.........ومرة اتذكر بالطب العدلي ديشرحلي عنهة لمن رحت سالته ......كال بالعراق ماعدنة غير بس الطريقتين الاولى والثانية وتتم العملية باماكن تخزي.......وساخة وقذارة والتهابات وموت احمر..........وكال العملية يوم ورة يوم ديزيد اعداد اللي يسووهة بس مو ذاك العدد بالعراق مقارنة بمصر مثلا ..........او لبنان.........








وين يسووهة؟.........


بالعالم اكبر مركز محترف موجود بفرنسا ومتحصل بيه حجز الا بالواسطة ...........واكو مراكز تجارية ما عدهة ذيج السمعة بس ناجحة تجاريا بامريكا وعددهة ممعروف بس هواية.........بالعالم العربي ماكو اي مركز مرخص من اي دولة لاجراء هيج عمليات لكن اكو مراكز تجميليه مال بشرة وتنحبف وهالسوالف وتسوي هالعملية من جوة لجوة ........موجودة بلبنان وبمصر.........وبالعالم العربي اكو هواية بيوت مشبوهة تخصصت باجراء هيج عمليات او عمليات الاجهاض او ما شابه من قضايا.........بالعراق اكو هيج بيوت حسب راي المختصين بالطب العدلي.........لكن العراق يعتبر من اقل الدول اللي بيه هيج توجه او بيه هيج قضية ........لكن العدد بازدياد حسب راي العاملين بهيج مجال............بقت منطقتين حرجة ايران وتركيا.........ذني بيهن كل البلة ........عدد اللي يسوون هيج عمليات بيهن لايعد ولا يحصى بالاحرى ميخلص اكو نسوان حتة يسوون العملية مرة ورة مرة ورة مرة.........والسبب تستر الدولة المباشر او غير المباشر............ترتيب الدول العالمي هو كالتالي ---ايران –تركيا – مغرب –مصر – جزائر – لبنان – اندونيسيا – ماليزيا- الهند – كندا – استراليا --- اللستة طويلة لكن لاحظ انه الدول كلهة عربية واستراليا وكندا من اكثر الدول اللي بيهم مهاجرين عرب.........يعني مخلص الحجي اللي ديسوي هيج عملية هو من اصل شرقي......










منو يكدر يسويهة ؟.............

ممرضة زايد بصراحة........بروسيجر العملية موجود عاليو تيوب اعتقد.........بامريكا مسموح لاي طبيب هستوة متخرج يسويهة قانونيا...........بالبلدان العربية اللي ديسووهة اغلبهم ناس جهلة وغنيين عن التعريف......بايران وتركيا ديسويهة الكل بمختلف المستويات وبتغاضي من قبل الدولة ..........









تكلفة العملية ومتطلباتها و مضاعفاتها؟


الكلفة من 180 دولار ويوصل لل 5000 دولار حسب المكان وحسب العناية والنظافة والتعقيم وحسب البروسيجر وطبعا الجيل الثالث هو الاغلى ثمنا..........
متطلباتها لاشي تقريبا........بنج موضعي وينام المريض بالمستشفة 4 ساعات بس ........وازالة خيط ورة اسبوع متطول 5 دقايق
مضاعفاتها........نادرة الحدوث اذا تمت العملية بمستشفى وتحت اشراف طبيب.......اما اذا اهمال فالمضاعفات هواية اولها الالتهابات البكتيرية والنزيف........







ليش ديسووهة؟


سببين رئيسيين :
الاول ........المجتمعات الدينية والثنية اللي تعتبر العذرية متطلب اساسي للشرف والزواج .......والشرقيين على راس هالقائمة باختلاف اديانهم ........يسووهة حتة يغطون حوادث عرضية تودي بالصدفة الى تمزق الغشاء ..........او يسووهة حتة يغطون حوادث ولادية وتشوهات خلقية ممكن تسوي مشاكل .........او يسووهة حتة يمحون اثار تجارب زنى سابقة.........وبالمناسبة الهندوس من ضمن هالكروب والللاتينيين اكو بيهم همينة هيج مجتمعات

الثاني.........بامريكا منتشرة سالفة شهر العسل الثاني او حتة الثالث..........يعني ناس تريد تعيش التجربة لان هية اصلا معايشتهة بالحقيقة فتريد تعوض ما فات........او ناس تريد تعيش التجربة الاصلية مرة لخ..........بعد الناس اذواق وهمة عدهم هامش الحرية واسع وديتفننون شيسوون .........اني معلية همة غلط لو لا بس ردت اكلكم اكو هيج ناس.....همة احرار وهاي حريتهم الشخصية ........وبالمناسبة الشغلة صارت تجارة ودك اعلاانات وسوق مزدهر وانطيتكم رابط يوضح هالمسالة........اللي يحب يشوفة براحتة...........


المشاكل الاجتماعية الناتجة عن وجود البكارة او عدم وجودهة ؟


المشاكل الاجتماعية هواية............

يعني يجوز البنية تفقد البكارة بحادث هاي شنو ذنبهة؟.......حتة لو ينطوهة تاييد من مستشفى.......ومنو يامن بعقليات مجتمعاتنة بهيج شي؟..........

يجوز تحتاج تداخل جراحي ملح يتطلب نزع البكارة........بحالة الاورام الخبيثة تحديدا.......هاي شلون حلهة؟........

الغشاء المطاطي شلون ؟.........
اكو حادثة حجالنياهة دكتور بالطب العدلي وهاي هواية من مرحلتي من جنت طالب بكلية الطب جانو كاعدين وسمعوهة..........يكول جنا رايحين عرس ولد صاحبنة فد يوم .......ورة مرجعنة ساعة وحدة بالليل خابرني العريس منتهي........يكلله مرتي داشك بيهة مو عذراء؟........لان ماكو اي دم .........بعد الفحص تبين ان البنية غشائهة مطاطي وهية عذراء ........هاي لو غير واحد مو طبيب ومثقف يمكن جان علكهة من شعرهة بباب البيت بس الله ستر.........
واكو صورة لبنية كل الممتحنين طب علي عملي شايفيهة مكطعة ايديهة والسلايد مكتوب علية جريمة عرض........هاي البنية اني باذني سامع الدكتور ديشرح قصتهة يكول هاي غشاها مطاطي واهلهة من الريف وسووبيهة هيج وعند الفحص طلعت عذراء وانعدم ابوهة واخوهة وزوجهة لان هيج سوو بيهة..........

الغشاء الواسع الفتحة شلون ؟...........هذا اصلا ميتاثر بالجماع............








المجتمع الشرقي والبكارة؟



اكو محورين مهمين بالمجتمع الشرقي بيهن تناقضات راح اناقشهن بايجاز لان الموضوع طويل........

المحور الاول..........اكو مبدا عند الشرقيين يكلك دريء المفاسد قبل الاستمتاع بالمكاسب.........يعني اذا شي بيه مضرة متسويه حتة اذا منافعة هواية........البكارة صح تضمن عفة وشرف البنية بس مو بكل الحالات ..........راح تنظلم ناس لان اكو نسبة بكارتهة مفقودة او مشوهة لسبب ولادي او لسبب حادث ...........وهذا ايضا راح يظلم الولد لان احتمال البنية تلعبة وتسوي عملية ترقيع للبكارة .........وواكو ناس منحطة وماعدهة ضمير تفكر اذا هية هاي شوية الدم هية الفاصلة بين الشرف والانحلال فشكو بيهة نجيبلة للولد شكم قطرة دم يفرح بيهة...........وصح العبرة بالغالب .........يعني الاغلبية مرتاحة بس اكو اقلية مو بس ديتاذون من هالشي بس حياتهم كلهة دتروح بسبب هالموضوع..........

المحور الثاني ...........احنة ميصير نبقة هيج ندور حلول وسطية.........لو يصير الجنس مباح للكل لو يصير محرم عالكل.........اكو فرق بين الحجي والشعارات من ناحية والتطبيق العملي من ناحية.........يعني الجنس بالنسبة للكل مباح بالخارج فماكو مشكلة من هالناحية ........اني مدا اكول همة صح او غلط لان هالشي نسبي عدنة غلط عدهم صح .........بس قصدي مرتاحين من هاي الشغلة مال البكارة...........بينما احنة نصيح الجنس حرام والجنس حرام وبالحقيقة احنة نحللة للولد ونحرمة عالبنية.......يعني مثلا لو انت ابو البيت وابنك يزني كلش كلش تطردة شكم يوم برة البيت وبعدين ترجعة ورة ميعتذر منك هاي اقصى الحالات.........واكو عوائل حتة بمجتمعنة ميديرون بال ويدرون بابنهم شيسوي ومغلسين يكلك عادي هوة ولد شكو عليه قابل؟.......وهذولة ترة مو قليل ..............ومن ناحية لخ لو انت ابو البيت وبنتك تزني شتسوي؟........اقل شي تلزمهة تشبعهة كتل هاي اذا متبريت منهة او اذا ما وصلت للقتل..........اني مدا اعمم عالكل بس هذا هو الوارد يصير عد كل شرقي..........شوفو الفرق بين التعامل .......يعني المجتمع ديكللة للولد روح ازني لان العقاب مو على كد الجريمة وترة السالفة مغرية فلاتكولولي ماكو رغبة بالموضوع........اكو نقطة مهمة كلش.........وضعنة اللي احنة بيه سلسة متصلة..........الولد مسموحلة او شبه مسموحلة يزني........راح يروح يقشمر على وحدة حتة يحقق اللي يريدة .........والبنية عاطفية راح تتقشمر بحالات معينة .........او راح تنجبر بحالات معينة..........يعني انت انطيت للولد السبب والوسيلة بس دتحاول تحصن البنية ...........يعني الولد خل نتخيلة مثل الجيش الصغير اللي يهجم على مدينة الهة الوف الابواب الصغيرة لازم مرة من كل ميت مرة ينجح ويكسر باب...........والمجتمع هو السبب بهالشي لان هو اللي ديفرق بالتعامل بين الجنسين .........واللي يضحك انه هوة ديحصن الجانب الاضعف .........يعني ديمنع البنية والبنية اكثر عاطفية ورومانسية من الولد واقل تحكما برغباتهة والمجتمع ديوفرلهة اقل فرص للاختلاط والتعلم ..........يعني شخص انت تحرمة من الاختلاط وتحرمة من التعلم الصحيح وتحرمة من ابسط حقوقة وتريد بيه كل الفضائل وتريدة يتخذ اصعب القرارات وتوكفلة على زلة وحدة حتة بس يغلط تكعد تاكل بلحمة اكل ...........شنو هالمعادلة المخربطة؟..........

نقطة لخ .........كلنا عدنا اصدقاء من خارج الكلية ومو شرط اطباء يعني من مختلف الطبقات الاجتماعية ..........ونوبات نشوف ناس تتبجح وتتباهة بعدد المرات اللي هوة زنا بيهة ..........يعني يعتبر هالشي فخر علساس هو ابو بنات ومكطع اعراض العالم تكطع..........هذا حجي قبيح واعذروني بس هذا الواقع.........اني بس اريد اكول شنو هالوقاحة؟.........شنو هالمنطق؟.......يسوي الغلط ويتباهة بيه؟.........وهاي هواية موجودة بالمجتمع.........

نقطة لخ بعد اضرب.........الولد عدنة ميقبل البنية الهة اي مغامرات جنسية من اي نوع كان قبل الزواج حتة لو تجي هية تعترفلة وتكللة اني تغيرت ومن هالحجي .......يعني الجنس قبل الزواج بالنسبة للولد خط احمر مو من الممكن يتنازل عنه ابد........شوفو الطرف المقابل.........البنية اذا اجاهة ولد للزواج بهواية حالات تقبل بيه كزوج حتة وهية تدري انه هوة عندة مغامرات جنسية وية غير بنات سواء هو كال او مكال .........زين البنية ليش مترفض هيج شاب؟.........ليش دتتقبله؟.........واسالكم لو الشاب طاك ومرتب وابن ناس وشهادة والبنية راحت كالت لامهة ماما اني ما ارضة بيه لان هذا قبل 5 سنين جان زاني وية فلانة امهة مو راح تنكلب على بطنهة من الضحك ؟..........هاي بمجتمعاتنة واردة ترة حيل............يعني مو بس المجتمع ديظلم البنية هية البنية دتتفنن شلون تظلم نفسهة ...........يعني البنية يعيبهة انه هية زانية قبل الزواج لكن الولد لا عادي مو كلش .........شنو هالازدواجية بالتطبيق؟..........وين المنطق؟............شنو الحكمة؟.........تفتح باب وتسد باب؟........تناقض بصراحة واضح.......

مخلص الحجي اذا احنة مجتمعنة يشوف انه الجنس حرام فلازم يعتبرة حرام عالكل ويعامل الكل على هالاساس ومو بس حجي تطبيق همين..........تطبيق مو بس شعارات كالعادة........




شنو وجهة نظركم بعملية الترقيع؟............
شنو حل المعضلة الجنسية بالمجتمع الشرقي؟.........
شنو رايكم بازدواجية المعايير بالتطبيق والحجي والشعارات الزائفة؟........
انت كطبيب لو اجتك وحدة منتهية حياتهة بسبب هالموضوع تسوي هيج عملية ؟.........
شنو رايك بالطبيب اللي ديسوي هيج عملية؟.........

الموضوع بعيد عن الدين ..........اجتماعي بحت





اني عرضت الموضوع بحيادية ...........هسة اجي انطي رائيي الخاص..........

اولا ...........عملية ترقيع البكارة غلط في غلط في غلط في غلط في غلط
لان الزواج ثقة واللي ينبني عالغش والخداع نهايتة الفشل...........العملية غير مبررة اخلاقيا..........اني ارفض المبدا........هاي العملية هية تجسيد واضح لمبدا الغاية تبرر الوسيلة .........يعني تغش شخص بكلشي بس مو بحياته الجاية كلهة لان الزواج والارتباط عمر كامل مو لحظة وكلشي ينتهي........بصراحة العملية قبيحة جدا.........

ثانيا ..........المجتمع ديتعامل وية المسالة كلهة بتخلف واضح .........يعني اذا انت تريد تضمن انه البنت متمارس الجنس فاكو طرق علمية وفحوصات سريرية ادق من هالطريقة ومينظلم بيهة احد ابد وبنفس الوكت متغلط يعني لو اي لو لا.........وزين ليش ما الولد هم يختبر بانه هوة ممارس هالشي؟.......لو هية على ناس وناس؟..........


ثالثا........اكو تمييز حتة بهالشغلة بين الولد والبنية.........العنصرية على اساس الجنس واضحة اتصور..........الحساب والعقاب ممتوزع بالتساوي................


رابعا ...........كلمة كلتهة واكولهة لان ارتاح من اكولهة..........المجتمع منافق .........يكول شي ويسوي شي ويزايد براسنة واحنة كلنة ضحاياه...........والشرقيين همة اول ناس بالمناسبة.........










هاي مواقع عالمية وعربية بيهة احصائات وتقارير وابحاث تدعم حجيي شوفو ولو بس اول واحد…………




هذا اكبر موقع طبي عربي........شوفو شكد اكو ناس دتعاني بسبب البكارة.......يعني المشكلة موجودة.........

http://sehha.com/cl/forumdisplay.php?fid=26


http://www.taipeitimes.com/News/taiw.../05/2003270421



http://www.foxnews.com/wires/2006Jun...ginity,00.html


http://www.highbeam.com/doc/1P2-142013.html



هذا يمهم بالغرب مو يمنة بس خليتة للاطلاع
http://www.post-gazette.com/pg/05349/622923.stm

صارلي فترة ما قاري موضوع حلو اهنا و صحيح هاي الظاهرة كلش زايدة بالعالم حاليا

ما شاء الله ايران و تركيا اكثر دولتين

<span style='font-size:14pt;line-height:100%'>اني اشوف حسب السبب يعني اذا صار حادث عرضي فايسوون هاي العملية بس اذا لا اني ضدها طبعا لان هذا كذب و خداع مثل ما كلت

ما اتصور الها حل و هذا الموضوع اكثر شي يعتمد عالوعي و عالمبدا و على غير شغلات و ما شاء الله مجتمعنا الوعي الي عندة قليل
بس رايي ما اكدر اعمم هيجي شي عالمجتمع مالنا مثلا لان اكو الزين و اكو الموزين يعني تعتمد على شنو هذا الشخص و شنو مبداة و درجة وعية و هذا الحجي يشمل الجنسين طبعا

طبعا شغلة كلش مو زينة لان اي حياة تنبني على نفاق و كذب مصيرها الفشل لا محالة و اني ابصراحة اكره هاي الازدواجية

حسب السبب بالنسبة الي ,اذا جان ابسبب حادث عرضي و غير مقصود اسويها علامود ما تتعرض لمشاكل هي بالمستقبل
بس اذا لغير سبب خصوصا سبب لا اخلاقي مستحيل اسويها

اما رايي عالاطباء فهم حسب السبب اذا لسبب عرضي فاشوف ما بيها شي
بس اذا لا هذا اصلا ما يستحق ايكون طبيب و ما عندة لا ذمة و لا ضمير يعني اذا اذا اعرف طبيب سوة هيج علامود يخفي على شغلات اباحية يسقط من نظري و شوه سمعة الطب همينة
عاشت ايدك </span>

الموضوع حلو عاشت ايدك لان حساس ومحد عنده جراه يطرحه بس مفيدجدا وزياده معلومات بصراحه اني استفاديت من عنده ووجهه نظري عالموضوع طبعا غلط في غلط وشنو ذنب المسكين اللي حاط ثقته بالبنيه اليزوجهه ولو تجيني وحده مسويه هيج مكسوره مستحييييل اسويلهيا وهي خلي تبتلي لعد شعرفت من هيج سوت خلي تاكلهه وتستاهل

مساء الخير
شلونكم شباب ؟ اتصور هل موضوع حيحرك الفورم شوية
بالنسبة لوجهة نظري لهل عملية هية عملية طبية ممكن تختلف بيه االاراء بس الثابت انه هية جانت موجودة وحتبقة موجودة دائما رضينا ام ابينا ....
ممكن شخص يشوف شي مبرر كافي لاجرائها وممكن شخص يشوف نفس الشي غير مبرر , مثل عمليات تجميل الوجه , تكبير الشفتين والاختلاف بيها بس اعتقد الحد الفاصل لازم يكون القانون والتشريعات بكل مادة ومع الاسف مكللنا الدكتور شنو راي القانون العراقي بهل شي ...
وشنو حل المعضلة الجنسية؟ وليش نسميها معضلة؟ اكو اعراف وتقاليد اجتماعية ودينية تنظم هل موضوع .. ممكن نلتزم بيها ومنشوف مشكلة , وممكن منرضة بيها وهنا نحس روحنا بمعضلة طبع ااذا نريد نضرب كل المجتمع اكيد نحس بمعضلة وهمين راح نخسر ....

ازدواجية التطبيق هاي مشكلة عامة بكل الاناسانية دائما الطرف القوي يفرض اسلوبة بالتعامل ممكن طرف سياسي ., طرف دولي او الرجل في البيت لهذا اذا كدرنا نمنع الدول الكبرى من ازدواجية التعامل ممكن نمنع الرجل والمجتمع من هل شي ايضا ... بس منكدر لان هاي سنة الحياة ....

وبالنسبة الي شخصيا ما اسوي هيجي عملية لان ما متاكد من موقفي منها فقد اتعاطف وية المريضة بس بطبعي ما حب اخالف الدين او القانون ... بس ممكن ادليها علة شخص يسويها اذا حسيت انه هية بصالحها

اسف عل اطالة وشكر االكم .....

مساء الخير
خلصت الامتحانات هسه وضروري نشوف مواضيع نشارك بيها وناقشها ودكتور نبيل عودنا على مواضيع تثير الجدل
صحيح قد اكون عضو جديد بس اني متابع قديم وقديم جدا واكاد اعرف اعضاء الفورام كلهم باراءهم ومبادءهم وحتى اسلوبهم هم
على العموم مشكور دكتورنا على الجهد الي بذلته في كتابه الموضوع وهو بالنهايه موضوع لاباس من النقاش فيه

بصراحه كلام لايحتاج الى كلام انا ميه بالميه وياك العمليه لا اخلاقيهو ماكو انسان يحترم ضميره يقبل بالغش بهيج موضوع

مااعتقد هذا مبرر كافي للاجراء هيج عمليهو الحل لمثل هيج مسائل هو تثقيف الناس ولو هذا شي صعب بس مو الحل الصحيح هو غش الطرف الاخر بعدين لو فتحنا مركز لاجراء هاي العمليه معناها اعطينا اذن عام الموضوع مراح يختصر على الحالات العرضيه بس

اني اختلاف وياك لامجال للمقارنه بين العمليتين ترقيع البكاره هو لاخفاء عيب اخلاقي وقضايا اكبر تمس حياه الناس مو بهالبساطه مثل تجميل انف او تكبير شفايفبالنسبه لازدواجيه التطبيق الموضوع جبير ويرادله حجي هواي

هذي مشكله ازليه منذ بدا الخليقه يعني مو جديده ولا هيه مقتصره على مجتمع دون اخر ولا هو بهذه الموضوع بس لا بهواي امور ولو اني ارفض السلبيه الي تعامل بيها عمر يعني صح هيه مشكله ازليه بس هي مو سنه الحياه نكدر نغير هذا الواقع الخطا اذا حاولنا واعتقد انو البشريه حققت هواي انجازات بهذا المجال

ومساله انو المجتمع يعاقب البنيه دون الولد
احب اعرض شي مهم اولا احنا كمسلمين نعرف انو الشرع ميفرق بحرمه الزنى ولا بعقوبه الزنى بين الرجل والمراه لا بالعقاب الدنيوي الجلد لغير المحصن والرجم للمحصن ولا بالعقاب الاخروي
واذا اكو تفرقه فهي من الموروث الاجتماعي قصدي انو المبدا صح بس الخلل بالتطبيق

..........


البكاره مو مقياس للشرف صحيح بس هي مقياس لعذريه الفتاه هذا شي يفرضه الواقع التكويني يعني مو بيد اي احد يغير هذا الشي صح اكو حالات استثنائيه بس هاي شكد نسبتها واحد بالميه مو اكثر يعني متلغي هذا المقياس

والله الصراحه مفهمت شتريد توصل من هاي الفقره الي كاتبها قصدك انو اي شخص يريد يتزوج يروح يسوي فحص لخطيبته يشوفها عذراء لو لا مااعتقد هذا كلام منطقي
او يجوز قصدك ان تلغى اهميه عشاء البكاره ليله الزفاف مو هذا هم شي منكدر نسويه يعني اي شخص خاطب ومتصور انو خطيبته عذراء ينتظر هالشي يصير ليله الزفاف خصوص اذا عرفنا انو الحالات الاستثنائيه حالات مو بس نادره فوق النادره هم
احنا منكدر نلغي اهميه هالشي بس نكدر نثقف الناس حول هذا الموضوع وانو اكو حالات استثنائيه المفروض توضع في الحسبان وعدم التسرع بالحكم على الزوجه اما ان تلغي اهميته فلا ليش ؟؟؟ببساطه لان هو مقياس واقعي لعذريه الفتاه

حيييييييييل صار شكد مقاري هيج موضوع حلو ودكتور نبيل احسدك على جرأتك ,وأتمنى لو عندي ربعها وصدكني هي هاي اللي توصلك


اني برأيي الموضوع غلط في غلط ,,وأني أشبهة بموضوع الأجهاض وأثنينهم يقومون على مبدأ واحد وهو تصحيح الخطأ بخطأ أكبر بعد

هاي عانينا منها وراح نبقى نعاني ,,,نكول احنا نشجب وننفي ولا نقبل والخراب موجود شلون ومنين اجا محد يدري

ابدا ,,

أني أختلف وياك ,,يعني البنية تكدر تعرفهة ممارسة الجنس قبل الزواج لو لا من الغشاء ؟؟ صحيح
زين وبعد الزواج شلون تعرف ؟؟؟ ما هية ممكن تخونك
هذا مو حل ,,مشكلتنا نعتبر الجنس اهم شي بالزواج بس هو مو اهم شي ....هو واحد من الاشياء
يعني صح انهو اذا اني محافظ على نفسي الى حد ما أزوج راح أتمنى تكون البنية همين محافظة على نفسهة ,,بس أذا تحب البنية وتحبك وتثق بيهة وتثق بيك ما توكف بوجهكم هاي المسألة

مشكلة هاي المشكلة هو الرجل(سيد البيت الشرقي) كلشي هو يسوي حلال وكلشي مرتة تسوي حرام
بأختصار أذا أنتة ممارس الجنس قبل الزواج ,,مو من حقك تجي تكلهة للبنية ليش انتي ممارسته ؟؟؟ اذا طبقنا هذا الشي راح تقل نسبة هذه الظاهرة فد 50% ,,,,وال 50 % الثانية تروح اذا خشت بدماغنا سالفة انهو الجنس مو اهم شي بالزواج وانما هو واحد من الأشياء

اسف على الأطالة

تعبت

لعد نبيل شيكول ؟؟؟ لا جديات الله يساعدك وعاشت ايدك

خوش موضوع

شنو وجهة نظركم بعملية الترقيع؟
شخصيا اعتبرها مو منطقية بس ممكن تبرر في بعض الحالات النادره كالحوادث العرضية. بغض النظر عن ذلك اني شخصيا لو كنت بعلاقة ويه بنية وعلى وشك الزواج افضل انه هي تجي تكلي تره صار عندي حادث عرضي احسن من ما تروح تسويها وتمشيها عليه. هسه ممكن واحد يكول شوف هذا القشمر هسه اي وحدة ممارسه الجنس مرات متعدده تجي عليك وتكلك صار عندي حادث انت راح تصدكها. لا اني مو هذا قصدي اللي اريد اوصله انه بنظري اثبات العذورية و التأكد منها او عدم ذلك هو ليس مقياس للشرف والاخلاص الزوجي بالمستقبل وانما الثقة هو المقياس. ممكن ومرة اللخ اكول ممكن يعني مو دائما عدم العذورية مؤشر انه البنية مملتزمه دينيا او ممقتنعة بتحريم الزنا او مؤشر انه كونها مو من النوع اللي تسيطر على روحها كل هذا ممكن بس عدم العذوريه او عدم القدرة على اثباتها ميعني ابد ابد عدم الالتزام المستقبلي بالحياة الزوجية

انت كطبيب لو اجتك وحدة منتهية حياتهة بسبب هالموضوع تسوي هيج عملية ؟
والله اي اسويها اذا شرحتلي وكالتلي اهلهي يقتلوني انقذها لسبب بسيط اني ماشوف الزنا شغله تستوجب عقوبة الموت ابد. بس في حالة اذا جتني وكالت رجلي يجوز يعوفني وكانت مأمنه على روحها من ناحية القتل لأ ماسويها لأن بالرغم من كون رجلها غلطان بنظري اني كطبيب قبل كلشي اكول الحقيقه للمعني. واكو غير امثلة اذا اجاك واحد متزوج وكلك اني عندي جهال وسويتله فحوصات وعرضيا بفحص عرفت انه هو عاقر اني شخصيا اكله تره ذوله مو جهالك مرتك جايبتهم من غير واحد لسبب بسيط اني دكتور ومن واجبي الاخلاقي اكوله للدكتور بغض النظر عن المضاعفات

شنو رايك بالطبيب اللي ديسوي هيج عملية؟
اعتقد جوابي السابق يبين وجهة نظري بهذا الموضوع

شنو حل المعضلة الجنسية بالمجتمع الشرقي؟
ماكو حل نقطة راس سطر. المجتمع هذا ميتغير لأن اللي يحاول التغيير ينقتل. يعني بالشمال بنيه اهلها قتلوها مال شرف وطلعت بالفحص عذراء محد انسجن من اهلها والصحفي اللي كتب على الموضوع دزوله تهديد عشائري.
اني اكلك ممكن تحل المشكله بينك وبين نفسك وتريح ضميرك بحلين الاول هو باتباع الدين حرفيا وتطبيق الاحكام على الولد والبنية بالمساواة مثل ما مذكور بالقرآن نصا او الحل الثاني انه تتبع اي معتقدات خاصه تكونها شخصيا وتخلي استنادك على المنطق والمساواة والعقل

شنو رايكم بازدواجية المعايير بالتطبيق والحجي والشعارات الزائفة؟
هاي من زمن جدي وجدك مثل الملح اللي ما بي يود . رأيي انه هاي مجمعات طايح حظها واللي يكتلك همه مديطبقون الاسلام بس حاسبين نفسهم عالاسلام. يعني همه ضاربين القرآن والاحاديث بعرض الحائط وبكيفهم يلوصون والتلويص بهالحاله اقصد القتل. اذا همه صدك مسلمين فالاسلام كايل البكر عقابه الجلد والمتزوج القتل ويستوي عند ذلك الرجل والمرأة وهاي كل عالم دين يكولها بس ويامن تحجي. يعني هذا المطي اللي يسويها ويقتل بنته او اخته حتى لو افترضنا شافها بالفراش ويه ولد ميدري بروحه الاسلام والله حيحاسبه كقاتل بغير حق لأن الجلد هو عقاب البكر مو القتل

وفوك كل هذا القهر القضاء والدوله متغاضيه. خصم الحجي اللي اريد اوصلة قاعدة غير قابله للشك وهي انه اعراف المجتمع فوق الدين بكل مكان بالعالم. بس اكول فرق باوروبا مثلا الجنس قبل الزواج حرام عند الكاثوليك بس روح لاسبانيا وايطاليا وكرواتيا وغيرها من الدول ذات الاغلبية الكاثوليكية وشوف حياتهم. احنا بالعكس ممتساهلين مصعبيها وفارضين عقوبات من عدنا يعني فلم هندي.
يعني تصور عدنا ناس حتى ميخلون بناتهم يركبون بايسكل اخاف يصير حادث و غيرها من التفاهات

انت تكول اعراف دينيه واجتماعيه الدينيه متفق وياك بيها ممكن نعتمد عليها بس فيما يخص الاجتماعية ماتفق وياك واعتقد بينت رأيي بهذا الشي
وانت تكول اذا نضرب المجتمع راح نخسر اني ماتفق ايضا لأن ممكن واحد ينسلخ عن مجتمعه ويترفع عنه ويصير احسن ويريح نفسه ويعيش حياة زوجية حسب مقاييسه دينية كانت هذه المقاييس او غير ذلك

حجيك صحيح ميه بالميه بس الى متى نكول الاسلام صح بس احنا دنطبقه غلط اشو محد من علماء الدين كام وكال فلان شي غلط وفلان شي صح والعالم ديتعايش ويه الاغلاط والعيوب وديتكيف وياها.
اني مدأكول اني ابي وداحارب الظلم واني مارت لوثر كينغ مال الماساواة بين المرأة والرجل بس رأيي انه اني اريد اطفر من هيجي مجتمعات لملايين من الاسباب واحد من ضمنها انه ماريد بنتي بالمستقبل رجلها يعوفها او تضطر تسوي هيجي عمليه لأن هي واكعه من البايسكل من جانت طفله

لك شنو انت صدك حجيك ذهب. يعني هذا اللي دأكوله بالضبط اذا انت هيجي ماخذ موضوع اثبات البكارة بجدية شنو اللي يضمنلك المستقبل


اخر شي اني اكول اذا انت تريد تصير براسي متدين طبق الاسلام بالضبط واذا انت شقاوجي وعندك علاقات جنسية سابقة بس تريد وحده مطالعه من باب بيتهم فهذا حقك ومو من حقي اتدخل بس اكلك انت بيك خلل نفسي لأن اللي يرضاها لروحه لازم يرضاها للجميع ومن ضمن الجميع مرته

it's more to do with the evolution of societies and the attempts of people from "undevoloped" societies to cover up for their desire of cacthing up...

الحمد لله اني كاتب بالعربي مو بلغه اخرى ياريت لو تقرون الفقره زين قبل ان تعلقون عليها حتى لا نقع بالاخطاء وحتى لا نعيد كلامنا اكثر من مره شكرا الكم

البكاره اكيد مو قياس للشرف او العفه هذا شي اني كاتبه بس هيه مقياس لعذريه الفتاه هذا واقع تكويني الا الهم اذا جانت بحاله استثنائيه غشاءها مطاطي او واسع الفتحه او تعرضت لحادث او ما الى ذلك لكن بشكل عام دا احجي

هذا وياي الحجي لو انت ده تناقش بشكل عام ؟؟؟؟

تحياتي

اني معلق على كلامك بعدين على كلام مدكالبوي ومن كتبت اخر جمله كلت اخر شي فاعتقد من الواضح مجنت موجه الجملة الك وانما داتلكم بصوره عامة.
واخاف مافتهمتوا شنو قصدي بالضبط فيما يخص اخر جملة اني اقصد انه اذا كان شخص ممارس الجنس قبل الزواج فمن وجهة نظري يجب انه ميمانع انه يتزوج وحده هي ايضا ممارسه الجنس قبل الزواج واذا يعتبر الوحده اللي عدها علاقات جنسية سابقه موخوش انسانه او مو مال زواج فهو ايضا مو مال زواج وموخوش انسان. اعتقد الكلام بديهي