مل مني القلم ومن القلم مليت, العــراق الشهيــــد
| Baghdad College of Medicine Forums |
 Help
 Search
 Members
 Calendar  Mail
|
| Welcome Guest ( Log In | Register ) | Resend Validation Email |
|
|
   |
مل مني القلم ومن القلم مليت, العــراق الشهيــــد| Aljubouri83 |
 Posted: January 03, 2008 06:03 pm
|
|
Percussing...  Group: Graduated Doctors Posts: 326 Member No.: 1045 Joined: April 21, 2007  |
مل مني القلم ومن القلم مليت .. عمت عينه قلمنه المـا نفع شِعره
تعب حتى الشِعر ويه العراقيين .. وصار بحال أهلنه وبالعراق أدره رسمت حروف العراق برسم فنان .. وجمعت أربيل والأنبار والبصره وگلت لازم حروفي توحد الخوّان .. ما معقـوله هيچ تصير فد مرّه ورديت ولگيت دموع عالوجنات .. حروف الرسمتهه اليوم متطشره كردستان تحچي بزودهه وتگول .. إحنه العاصمه وبغـداد متأخره والأنبار شالت سيف عالخوان .. لو لـيّه الحكم لـو فلّش الاسره والبصره تگول إحنه نريد إقليم .. ومن نفط العراق إلكُم فقط عُشره وشفت للفتنه والله العراقيين .. دون حروف جر يا ناس منجرّه مذبوحه المحبه وناس تكره ناس .. سويّه إللي يحب والقابض الجمره رقم جبنه قياسي بالقتل والموت .. وصرنه أول شعب نص أهله متهجره نهر دجله يـا ناس من الجثث غرگان .. خلي نمد إيدينه لدجـله وإنجرّه على جثثنه تدوّر هالفضـائيات .. ياهو إللي يصور ياخذ الأجره معصوبه العيون مچتفه الإيدين .. وأنواع الرصاص يچوب بصدره لا أهله إجوي وچـفّنوه بچفان .. مجهول الهويه ومن دره بأمره إذا أمّه الحنونه الصايمه برمضان .. ما أكلت أكلهه وبقت تنتظـره تنتظره يرد وتريد تحچي وياه .. أثاري العيد لازم ينگطع مهره لأن باعت ذهبهه بشارع الصياغ .. حته تزوج إبنهه إلما فرح عمره ما نامت بقت سهرانه كل الليل .. أيا ليل العراق إلما بزغ فجره وما جاهه صبر طلعت تدور عليه .. مثل طلعة حمامه بعينهه العبره وما شافت إبنهه وجاهه ملك الموت .. تعرف شنهي يعني تموت بالحسره؟ معناها الفرح صاير مثل رجّال .. شايل ورده بيده وخنجر بضهره معناها عراقك كاتل ومكتول .. سوده گلوبهم وعقـول مفتره وكل هذا ويگلي إحنه العراقيين .. سنه وشيعه عشنه الحلوه والمره لا والله چذب إحنه العراقيين .. سنه وشيعه مثل الضره عالضره ملينه الچذب وليمته وليا دوب .. واقع حال لازم نخضع لامره ملينه الچذب وليمته وليا دوب .. قصايدنه إجت للناس متأخره نعم خوّان إحنه وياك آني بهاي .. بس مو من بعد تفجير سامرّه بعد تفجير سامرّه العراقيين .. مثل فلم الرعب ودمايته الحمره مو فتنه صحيح الصايره إبّغداد .. سونامي الفتن إبغداد منتشـره قتل مو عالهويه هواي متوهمين .. صارت عالأسم يگص راسه ويشمره وإليگلّي تبالغ إنته حيل بهاي .. جبت حجه ودليل وياي هالمرّه أتحده بكر وأتحده أبو الخطاب .. فنّه واحد البيهُم يوصل الثوره وأتحده على وأتحده هم حسين .. إذا فلوجه طبهه ومنكسر ضهره صفر كل النتايج للعراقيين .. بس بالفتنه جابوا عشره من عشره هذا يگول سني ناصبي إغتالوه .. وهذا يگول شيعي رافضي نكفره ضلّوا بهالسوالف يا خزي ويا عار .. وإسرائيل علگت نارهه الكبره يول وين الـشرف گدامكم بغداد .. شگّوا ثوبهه وأخذوهه متأسره إغتصبوهه الكُفر، ما تسمعوهه تصيح ؟ .. آنه أم الشرف واليوم مو عذره بعد والله ما يـنفعنه قيل وقال .. لأن كلشي إنتهه وإنكسرت الجرّه مرحوم العراق إستشهد من خمس سنين .. يا وسفه صفت أشلائه مـتنثره متنـثره بمزابل و يمهه كوم چلاب .. أكلت من لحومه وما درت سرّه صير وياي بس هالمره ، أترجاك .. عيب من العـراق اليوم نتبرّه صعبه بمزبله جثة الـعراق تصير .. خلي نشـيله منها وندفنه بگبره Attached Image  |
    
|
0 User(s) are reading this topic (0 Guests and 0 Anonymous Users)
0 Members:
 |
|
