من يتحمل مسؤوليه خسارة المنتخب

[Fahad Sheikhly]

هلو جميعا بس اريد اشوف اراء الجميع حول منو برايكم يتحمل مسؤوليه الخساره مال منتخبنا ويه السعوديه وخروجنه من البطوله لانه هذا فد شي جدا يضوج وحبيت اشوف اراءكم بالموضوع هل هو المدرب؟ لو الللاعبين ؟لو الحكم اللي هو برايي ابو المشكله كلهه وشكرا

Fahad

[m7md7atem]

اول شي شكرا عالموضوع اللي لازم نتناقش بيه

برأيي المتواضع اعتقد انه الاسباب متعدده وميصير يكون اللوم على طرف واحد ...

يعني اول شي المنتخب السعودي اقوى من منتخبنا.. هي لا مسألة تحضير ولا انسجام همه احسن من عدنا ويستاهلون الفوز بالمباراة لأن برأيي همه احسن فريق يحضر هجمه بالبطوله ...

السبب الثاني هو المدرب مالتنا (الشفيه) مو لأن منزل لاعب معين او لأنه لعب عالتعادل بس لأنه مدرب ما عنده عقليه تكتيكيه متطوره يعني بين قوسين ميعرف شلون يوظف اللاعبين اللي عنده ولا يخلق فد جو من الانضباط بيناتهم... يعني منتحبنا باللعبتين الاخير وبالشوط الثاني من لعبة قطر ممترابط وماكو بي انسجام بين الخطوط الثلاثه ماكو اجنحه ثابتين ماكو صانع العاب ثابت .. تحضير الهجمه بطئ وغير منتظم وكل الهجمات اللي سواها منتخبنا هي نتيجة مهارات فرديه او اجتهادات لاعبين لا اكثر ولا اقل ...
واهم اهم اهم نقطة ضعف بمنتخبنا شغلتين
- الانتشار الغير جيد : يعني قصدي تحس فريقنا لواعيبه اقل من الفريق المنافس ليش لأن انتشارهم مو زين
-عدم توزيع المهام بين اللاعبين: يعني تجي اوقات اكو لاعبين يختفون وغيرهم همه اللي يلعبون كل اللعب بحيث يخليهم يفقدون لياقتهم بسرعه
طبعا اضافة الى انه المدرب اصلا مسحب اثنين من احسن اللاعبين وهمه قصير منير افضل ارتكاز عدنا وباسم عباس افضل جناح مدافع ...

السبب الثالث لخسارتنا لعبة السعوديه بالذات هو الحكم الاماراتي اللي انطاهم ضربة جزاء مو صحيحه حسب اعتراف علي بوجسيم ببرنامج الصافره اللي اني شفته اضافة الى العميد فاروق بوظو رئيس لجنة الحكام بالاتحاد الآسيوي ..
والشي المثير للسخريه انه هذا الحكم حكمنا مباراتين من تلاثه مع العلم انه مبارة السعوديه هي سادس مبارة دوليه اله !!!!!

اخير شي اريد اكول انه البلبله والضجه الاعلاميه اللي صارت وره المباراة هي فضيحه ومهزله مخزيه للكره العراقيه امام العالم كله... يعني حتى لو فرضنا المدرب وحسين سعيد سووا هيجي وكالولهم لتفوزون للاعبين همه اللاعبين ليش سكتوا وصاروا جزء من هاي المؤامره العفو اقصد الاتفاقيه؟؟؟ ليش محاولوا يبلغون مسؤول عن هذا الفساد الاداري ليش مهمه هددوا للمدرب ؟؟؟ شنو هي مزعطه ؟؟ هذا منتخب واسم العراق عيب نتفق عليه ... وبصراحه اني اعتبر تصريحات عماد وهوار ويونس ما هي الا دليل واضح على سذاجتهم وصغر عقليتهم ... ولو همه صدك يحبون العراق جان طلعوا قبل اللعبه وكالوا يا شعب العراق هذا اللي يريد يسوي المدرب او حسين سعيد او ايا كان ...
واني اعتقد انه ماكو هيجي اتفاق ابد وانه المدرب يمكن كللهم لعبوا للتعادل وبطريه دفاعيه بس مأتوقع كللهم لتسجلون او لتفوزون ..

والسلام عليكم ورحمة الله وبركاته

[ali al-kafaji]

well i think it is the coach fault,he played on the draw and he entered ahmed salah and did not enter razak farhan....it was a major depression.

ali

[doddi]

اني بس اريد احجي حجاية وحدة بالاضافة الى محمد حاتم و الي هي


احمد صلاح اسوء لاعب اني شايفة من اول ما شفتة من وكت الفريق الاولمبي و عار عل الفريق العراقي بيه هيجي لاعب طوبة مثل الاوادم ما يعرف ايجوت و ما بية اي مواصفات الاعب الزين لا جسم لا مركز ثابت ياخذ اشو لا هو شبه و لا هو راس حربة يمكن بس اشوية سريع

و الظاهر اكو خلخلة بداخل الفريق العراقي و مشاكل بين المدرب و اللاواعيب و بين الواعيب نفسهم الظاهر اكو مشاكل و اكو شغلات الظاهر احنا ما نعرف بيها بس الله يعلم

و اخذوها قاعدة يا جماعة اي بطولة كاس الخليج ما نكدر انسوي شي بيها لان همة ما ايريدونا نصعد و نتفوق عليهم و ابد ابد ما ايريدونا انفوز بهالبطولة لان بالتلفزيون اني سمعت واحد خليجي كال ان شاء الله الكاس خليجي خالص لا عراقي و لا يماني بدون تعليق
و الله احترك كلبي من ورة خسارة المنتخب و خيرها ابغيرها ان شاء الله

[realmadrid]

اول شي شكرا على الموضوع
اني اشوف انه السبب الرئيسي لخسارة المنتخب هو المدرب اللي اصلا الخطه مالته هي توكلنا على الله + مهارات اللاعبين (هوار ونشأت ويونس ...) ، بمبارتنا ويه السعوديه اللي صار انه يونس ماكو باقي اللاعبين الظاهر تعبانين فهنا اجه دور المدرب اللي معرف يختار البديل و اني اوافق علي عادل انه كان المفروض ينزل رزاق مو احمد صلاح.
اما عن انه العراق ممنوع يفوز بكاس الخليج فما اعتقد لانه بكل بساطه انه السعوديه لعبت احسن.

[Fahad Sheikhly]

طبعا بالبدايه شكرا على الاجوبه اللي اعتقد انه كفيتوا ووفيتوا بيهه لكن صدكوني ما اعتقد انه شخص مثل حسين سعيد رح يتلاعب بأسم العراق مثل ما كالوا بعض اللاعبين انه اكو اتفاقيه بين الاتحاد العراقي والسعودي او البحريني لكن اذب اللوم كله على اللاعبين الي ما قدروا الجماهير اللي تابعتهم بأي مكان بالعالم ومع كل الاسف فاللاعب العراقي معروف عنه المزاجيه من يريد يلعب يلعب ومن ما عنده واهس يذب الصوج على المدرب. كل احترامي وتقديري للاعب مثل هوار الملا محمد وحارس مثل نور صبري الللي رفعوا اسم العراق عالي ومع الاسف للبقيه اللي مقدموا شي مجرد انه همه يلعبون ضد دول همه يلعبون بانديتهه وبصراحه برأيي انه العراق المفروض ميلعب بهيج بطوله الفلوس هي اللي تشتغل بيهه مو العزيمه واللعب الحلو والتحكيم الشريف , وشكرا مرة ثانيه للي ردوا على هذا الموضوع

Fahad

[Navigator]

السلام عليكم

خسارة المنتخب شغلة مو سهلة علينا كلنا وصدك لازم نحجي بيها ونفكر شنو السبب
حسب اعتقادي المتواضع ...فريقنا مجان بالمستو اللي يأهله انه يفوز وحتى لو صاعد لنصف النهائي هم جان خسر
السبب هو خط دفاعنا اللي مجان زين وية البحرين وجان أسوأ ويه السعودية...يعني السعودية مجانوا أقوى منا بس استغلوا ضعف دفاعنا الواضح...أما ضربة الجزاء اللي صارت فهي غير صحيحة والحكم من حسبها سواء متعمد او سوء تقدير منه جان تأثيرها كلش واضح بالاضافة الى ضعغف المستوى العام للفريق

أما بالنسبة لمسألة بيع اللعبة مثل ما طلعت الاشاعات فما أعتقد أكو لاعب أو مدرب أو عضو بالاتحاد العراقي لكرة القدم ممكمن يبيع اللعبة ويبع وطنه مهما كان المقابل

وبالنسبة لتصريحات اللاعبين فجان كلش واضح انهم غير متفقين فيما بينهم وأيضا أكو مشاكل ويه المدرب بس شي على شي جانت المشاكل اللي بداخل الفريق مخزية أكثر من الخسارة نفسها


بس... الله كريم

[hasso]

الكل يتحمل المسؤلية وبالاخص المدرب الي نزل احمج صلاح بدل عماد محمد شبي عماد محمد زين ليش ما نزل رزاق فرحان شنو خالة خمرة