اhi All

شلون الدكاترة اني جنت بطب بغداد وكضيت 3 سنوات متنسي بيهة وهسة اني بجامعة مصر داكمل دراستي هذي اول مرة افتح توبك بهالموقع ولو اني اجيكة بس مو هواية يعني بالشهر مرة واعرف شنو الجديد بي وعاشت ايدكم بي شغلات كلش تفيد بس عندي ملاحظات صغيرة وياريت المودرايتير ياخذ بالة منهة يعني الموقع مايرتقي ان يكون واجهة لطب بغداد (الحجي بيناتنة ) باعتبار ان الكية ماعدهة موقع فهذا الموقع يعتبر واجهة الكلية يعني صارلة سنتين نفس الشي اني قبل سنتين يمكن فتحتة ولحد الان بي نفس الفروع ونفس الدزاين مال قبل سنتين ابسط شي اخلي صورة للكلية بالصفحة الرئيسية. يعني انزل محاضرات مال طب بغداد لكل المواد وجميع المراحل.. لان الطلاب من قبل مايفوتون محاضرات فرح تفيدهم او حتة اللي يفتحون الموقع من خارج الكلية رح يعرفون قوة الدراسة ومستوى الطلبة من خلال التكست اللي همة يدرسو واحتمال يكون مفيد الهم ... افوت عمليات جراحية واصورهة وانزلهة عالموقع وبهالحالة رح يكون كلش طاك .. افتح فرع لاخ اسمة كايس ستدي اشرح او اصور بي حالات مرضية او اسأل بي عن حالات واخلي الفايت للموقع يشغل مخة او هوة يسأل عن فد شي معين او حالة شافهة بالمستشفى ..اناقش امور ما بعد التخرج والدراسات العليا والامتحانات مال بلاب وغيرها واكو تحديث لهاي السوالف لان اكو طلاب لحد الان مايعرفون هاي السوالف..اسوي تنسيق بين ادارة الكلية والموقع وانزل اعلانات الكلية او النتائج انزلهة بالموقع بلا ماعلك الدرجات وكل طالب عندة ايدي وباسوورد هو بس يعرف درجاتة ويخلي كل الطلاب يفتحون الموقع واكو افكار هواية يعني اهم شي يكون الموقع مو ممل وعاشت ايدكم مرة لخ وانشالله اسمع الرد منكم والغاية انه نرتقي بالموقع حتة يعكس مستوى طلاب الكلية ... وهسة اريد اسمع الرد الموقع يحتاجلة تغيير لو لا؟؟؟؟؟؟؟؟؟؟؟؟؟؟؟؟؟

اهلا و سهلاً دكتور

بالنسبة لملاحظاتك فواضح انو هية نابعة عن حرص ع الموقع و رغبة بالتطوير مشكور عليهة، بس حبيت اشرحلك شغلة:

هذا الموقع مستقل تماما عن عمادة الكلية و توجيهاتها، و اني باعتقادي انو هذي هي احد اهم نقاط القوة في الموقع، و الهدف منه هو خلق حيز للاستمرارية والتواصل بين الطلاب في شتى المجالات، و ليس الهدف انه يكون واجهة رسمية للكلية، بالعكس يوم اللي يصير الموقع رسمي و بارتباط مباشر بالكلية راح يحكم عليه بالفشل، اعتقد انو حضرتك فاهم قصدي.

اللامور الذاكرهة اغلبهة موجودة اساساً، و الحلو بموقعنا انو هو منتدى و ليس موقع جامد، يعني اي واحد من الأعضاء يقدر يكتب اي شي يريده، مثلاً المحاضرات و الكيسات الطبية و ما الى هنالك، و لو حضرتك ماخذ وقتك في البحث في الموقع و استكشافه كان لاحظت هذا الشي، و لاحظت امكانية الإضافة و المشاركة العلمية اللي متاحة للجميع، اي واحد يقدر يساعد زملاءه اذا يريد، بس مع الأسف اغلبنا نفضل المطالبة بدل ان نتعب نفسنه و نشتغل احنه، نريد كل شي حار و مكَسب و رخيص.

ياما اننشرت درجات بالموقع، و ياما انحطت أسئلة، و ياما ناس فتحت مواضيع تطلب مساعدة دراسية و لقت من جاوبهة، و هاي كلهة من مشاركات الأعضاء نفسهم، بسبب حب المساعدة و روح التعاون.

اعتقد انو حضرتك دتطالب بموفع ستاندرد، و ليس منتدى (فوروم)، يمكن بعد كلامي اللي فات لاحظت الفرق؟

شكراً مرة لخ و احنة نعتز بوجود ناس حريصة ع الموقع مثلك.

كاظم عماد
مؤسس المنتدى