في ظل صمت مطبق يعاني منه موقع الكليه ههههههههههههه حلوه هاي مال مطبق مو ؟؟؟؟؟
لا والله بس صار اكثر من شهر غايب عن الموقع ورجعت ملكيت ولا حتى موضوع جديد واحد مع الاسف

على العموم خلال دوامنا بصف سادس واختلاطنا باجواء المرضى والمستشفى اطلعنا على الكثير من حياه الاطباء المقيميين ولايزال يغيب عنا الكثير المهم الي لاحظنا بعض النقاط الي احب ان اعرضها هنا

اولا عمل الاطباء المقيميين الدوريين يكاد يكون بعيد كل البعد عن عمل الطبيب بما هو طبيب يعني في قسم الاطفال لاحظت معظمهم يهتمون بنقل الادويه والادوات والمستلزمات الطبيه بدون ان يكون اي اختلاط مباشر مع المرضى او اي ممارسه لدورهم كاطباء وكذا في قسم النسائيه البعض منهم يقتصر عمله على قياس ضغط الدم هاي باحسن الحالات وغيرها الكثير من الصور في باقي الاقسام

ثانيا ابتعاد الاطباء الدوريين عن الاختلاط المباشر بالمريض يولد حاله من الفراغ الرهيب والمثير للشفقه صراحه لدى المريض صور مؤلمه شاهدناها للمرضى الي حتى ميلكه احد يساله عن اماكن معينه بالمستشفى او عن مكان المختبر او التحليلات او وين يروح منين يجي من وين يجب فلان شغله ينطو ورقه وهاي هيه وهو اصلا ميعرف يقره وميعرف شيسوي بيها او وين يوديها وحسب ماشفت معضم زملاءنا الاطباء الدوريين ميكلفون نفسهم حتى بالاجابه على اسئله الناس وحاجات اخرى للمرضى مو بس السؤال انما ذكرته باعتباره ابسط حق للمريض الحقيقه انهو هناك تلكو كبير بعمل معظم الاطباء مع شديد الاسف

لااريد ان اكون غير منصف في حق اطباءنا ربما يغيب عني الكثير من تفاصيل حياتهم او معاناتهم داخل المستشفيات العراقيه بس الي شفته اثار في نفسي الكثير من الالم
بودي لو اسمع اراءكم بالمساله وان كان عندي بعض النقاط الي اكدر اعتبرها اسباب لمثل هكذا سلوكيات احب اناقشها هنا

اولا المساله باعتقادي تعتمد بدرجه كبيره على اخلاق وتربيه ومبادى الطبيب ومدى احساسه بالمسوؤليه لان الدافع الداخلي هو الاهم في هذه الحاله

ثانيا انعدام دوام الطبيب بالمؤسسات الصحيه الخاصه الي يتعود بيها على رعايه المرضى واحترامه وتكريمه واذا قصر في واجبه راح يحاسب ويعاقب ويجوز يطردوه هذا هم عامل مؤثر اخر

ثالثا هناك حالات متوارثه من جيل الى جيل بين الاطباء واحد يعلمها للاخ ونصائح مع الاسف حتى احنا بصف سادس مرات يسمعونياها على اساس نتعلمها من هسه حتى منعاني بعدين نصائح تصب في اهمال المرضى والتملص من مسؤلياتنه

رابعا المشكله الكبرى والعظمى فشل الموسسه الصحيه العراقيه بمختلف تفاصيلها والاطباء جزء من ذلك والي لست بصدد نقاشها بالوقت الحاظر لكن تبقى هيه احدى اكبر واهم الاسباب


شكرا جزيلا واتمنى حقا ان لايقابل الموضوع بالاهمال شاركونا باراءكم

تحياتي

مرحباااااا
عزيزي دكتور بريشص ولو جنت أفضل أعرف اسمك بس مو مشكلة

رح أجاوبك بسرعة على النقاط اللي طرحتها بخصوص المقيم الدوري كوني خلصت أول سنة من الاقامة الدورية وصرت هسه كرونك وأكدر أكول انه هاي السنة يجوز مو جبيرة من ناحية الخبرة الطبية بس صدكني من ناحية الخبرة الحياتية كلش جبيرة وتخليك تاخذ فد ذبة معينة وطريقة تعامل بيها الناس بباقي حياتك الطبية

أولا:
المقيم الدوري تختلف واجباته ومسؤولياته حسب المستشفى اللي يداوم بيها وصدكني ممكن يكون هو المنقذ بهواية مكانات بينما ممكن يكون ضيف بمكانات أخرى...يعني اذا داومت بمستشفى تعليمي مثل مدينة الطب طبعا رح تكون فرصة التعليم قليلة لأن أكو مقيم أقد وطلاب بورد فوك راسك ياخذون القرار ويسوون الاشياء الامهمة بينما انت رح تكون مجرد تكملة عدد أو مثل ماذكرت تكتب أوراق وتقيس ضغط وماشابه...بينما من تداوم بمستشفى غير تعليمي وهواية أكو منها ببغداد وأكثر بالمحافظات فرح تشوف مسؤولية جبيرة واعتماد جبير على المقيم الدوري وبتعبيرنا نكول ينطوه شغل حلو وصدك يحس نفسه طبيب ويعتمد عليه

ثانيا:
بخصوص كيفية تعامل الاطباء بصورة عامة مو بس المقيم الدوري فهاي بيها هواية عوامل تحددها وتأثر بيها وطبعا مو الكل سوا يعني تختلف من طبيب الى طبيب ثاني وبمختلف المستويات مقيم دوري, مقيم أقدم, أو أخصائي...مارح أحجي عن نفسي وعن طريقة تعاملي ويه الناس بس أكدر أكول انه أكو ناس أنواع بيهم اللي مايطلع صوته أبد ويخليك تنقهر عليه وبس تريد تساعده وأكو بيهم ناس مزعجين كلش وماينطون مجال أبد وتبتلي اذا جاوبتهم على شغلة لأن يشلعون كلبك وراها بالأسئلة والطلبات...وأكو بين ذولة وذولة

بس بالمحصلة لازم يكون عندك فد طريقة للتعامل ويه كل نوع حسب الظروف الموجودة حولك لأن أكو أمور سهلة كلش وتنحل بحجاية وماتسوى تعقيد بينما أكو أمور يرادلها شغل وتعب وممكن يكون حلها مو يمك بس الناس تجلب بيك لأن انت الموجود كدامهم




اووووووووووووووووووووف يرادلنا كعدة وسوالف كوووووووووووومة على المقيم الدوري

طبعا أكو جوانب كلش حلوة بحياة المقيم الدوري يمكن ماتنذكر هواية بس تره بيها فترات تكون من أحلى الايام بحياتك

انشالله أكون وصلت ولو جزء من الفكرة تحياتي وسلامي للجميع

د.زيد محمد التميمي

شكرا دكتور زيد على كل نصائحك و حجيك الحلو الناتج عن خبرتك بالاقامة ابسنتك الاولى ابحياتك الطبية و اتمنالك كل الموفقية ابحياتك الطبية

ان شاء الله حنخوض السنة الاولى بالاقامة و ان شاء الله الموفقية لكل زملائي الاطباء في كل مستشفياتنا و كل واحد بينا حيخوض تجربتة الخاصة الي بيها الزين و الموزين

بس اني سامع من كومة اطباء اكبر من عدنا بان احلى شي بالطب هي حياة الاقامة الدورية فان شاء الله الكل ترتاح بيهة

شكرا دكتور على مشاركتك
مرحله جديده من حياه الانسان بلا شك تحمل الكثير من الخبره والشاطر هو الي يعرف شلون يتعلم منها


لكن لم تجبني عن جوهر الموضوع عن اسباب هذا التلكؤ والاهمال والامبالاه في عمل معظم اطباءنا

هل هيه ازمه ضمير يعاني منها المجتمع العراقي ككل صارت بيها قيمه الانسان شي ثانوي

ام انها حقيقه تكوينيه عند الانسان ميشتغل صح ولايخلص في عمله الا اذا انوضع ضمن مجموعه من القوانين والضوابط وباعتبار الفوضى الي تعاني منها الموسسه الصحيه العراقيه ولدت هذه الحاله



اني الي خلاني اكتب الموضوع موقف صار بكورس الاطفال عن طفل مات بسبب اهمال طبيب مااعرف اذا جان مقيم دوري او لا كل الي صار كدامنا بضع كلمات تانيب من الطبيب الاخصائي وهاي هيه والطفل راح ومات وامه وابوه واهله مابيدهم شي
ماعرفت بوكتها احط نفسي بمكان منو بيهم

مكان الطبيب وكيف ممكن اعيش بعقده الذنب اكمل حياتي واني السبب بموت انسان

او اكون مكان الام طبيب يقتلي طفلي



والاكثر من هذا من تسمع نصيحه غريبه لازالت كلمات واحد منهم بدهني من يقول
هو مريضنا العراقي الله يستر عليه شلونه يريد اذا حرك ايده اليمنه فد 5 اطباء يركضون عليه واذا حرك ايده اليسرى فد 10 ممرضين يركضون بابا روح لغرفتك واقفلها ونام والناس الهم الله

قد تكون هاي الكلمات مبالغ بيها بس هيه تعبر عن ثقافه عامه موجوده ووجودها مؤشر خطير هيه مو بس حالات فرديه هنا وهناك او اخطاء طبيه ممكن تصير بكل مكان بالعالم اني دا احجي عن فكره وجودها بحد ذاته يخوف هاي اذا اطورت وصارت ظاهره وثقافه عامه بعقول الاطباء تعتبر ماساه حقيقه لابد من محاربه مثل هيج نظريات ومثل منثقف بحقوق الانسان واو بالديمقراطيه لازم تقديس حياه الناس بالدرجه الاولى قبل ان يعلمونا اصول الطب وفروعه المختلفه



تحياتي

دكتور بريشس قريتي اخر موضوع الي؟


مقالة كتبتها وانشرت بال بي ام جي....اتصور ناقشت بيها هواية شغلات انت هسة دتطرحيها بغير اسلوب......اقريها ورديلي خبر بلكي تلكين بيهة اجوبة



كلامك للاسف جزء كبير منه صحيح وواقعي ...هذا واقع الطب هنا
وطموحك للاسف ايضا خيالي ومثالي بالذات بالعراق....مع كامل احترامي

http://www.thebcmf.com/index.php?showtopic=4568

هذا الي كال هاي الحجايه انسان تافه جدا
وعيب عليه يكول اني طبيب...صحيح المرضى متطلبين جدا و لحوحين جدا
بس هاي مهنتنه الي اختاريناهه
فاذا كان اكو اي سوء بالاختيار فعيب نذب اللوم على الغير مو لو مو مو؟؟؟
وصاحب هاي المقوله التعيسه هسه دخل التأريخ من اوسع ابوابه بس تاريخ
الخزي والعار على نفسه و مهنته

للاسف اكو حقيقه غايبه عن كل الناس....وهو انو الطبيب هو انسان حاله حال غيرهه
ممكن يخطئ وممكن يصيب...ممكن يكون انسان وممكن يكون انيمال
ممنكن يكون ملاك وممكن يكون شيطان

اسف على الاطاله بس اذا نريد صدك نحجي فيرادلنه ايام
لان اليوميات متختصر باسطر متواضعه خجوله من وقع الحقيقه التي تسردها

شكرا على الموضوع

تحياتي

السلام عليكم
تكدر دكلنا شون قصر الطبيب او الطبيبة ببعض التفصيل عن الحادثة دون ذكر الاسماء طبعا حتى منوكع بنفس الغلطة لا سمح
الله

اذا امكن

تحياتي

شكرا للجميع على المشاركه

دكتور نبيل اني احييك على المقاله عمل جميل وفعلا فيه تحليل موضوعي للواقع الصحي في العراق

النقطه الي اريد اوصلها هنا هي ان لانضيف عبئ جديد وتقيل على كاهل الواقع الصحي المتردئ بالاساس لابد ان لاتتحول نظريات الاهمال والامبالاه الى ثقافه عامه عند الخريجين الجدد

اذا طوقت احلامك بسور الواقعيه راح تخنقها لابد ان تطلق لها العنان والا لن تكون هنالك من احلام

ثم اني لااعتقد انو طموحاتي خياليه لاني ببساطه لازلت اؤمن بامكانيه التغيير انا لم ولن افقد الامل



دكتور علي عن الحادثه الي سمعته هو انو الطفل جان يعاني من انيميا حاده وبقو 3 ايام بدون ميعرفون سببها مده يكدرون يشخصون حالته ينطو دم ومده يتحسن والطبيبه الاخصائيه جانت موصيتهم انو ينطو دم كل ماتتدهور حالته احدى الليالي امه راحت للطبيب الخفر بالردهه اجه الطبيب شافه ملكه بي شي وره فتره هم رجعت عليه الطبيب اصلا مجاوبها عباله مثل اول مره كعدو الصبح لكو الطفل ميت احنا الي شفنا بس من الاخصائيه جانت ده ترزل الطبيب الخفر سالنا عن الي صار كالو هيج وهيج


تحياتي

هلو
صارلي فترة طويلة بلا مشاركة
هسة اني مقيمة دورية اطفال ب مستشفى الطفل المركزي التعليمي
الزم 48 ساعة ردهات ولوحدي وانطي ادوية اني الخطرة مثل دجوكسين وولومينال وعندي تعامل مباشر وية المرضى وحبابة وياهم
الى اليوم شفت انه محد يستاهل اتعب الة من المرضى بعد ما اني ضليت الليل كلة كاعدة انطي علاج واراقب حالة الطفل الاهل مال المريض يكولون الدكتورة ماانطتنة علاج وصلت الى قرار من اليوم بعد اتعامل وية المريض بشكل رسمي لان محد يستاهل اهتم واتعب نفسي
واي كلمة احجيها تتاول بشكل ثاني من اهل المريض
والشغلة الخ الي صارت بية احنا عدنا مبيت ردهات دكت ام طفل ساعة 3 ونص الصبح الباب عليه دكة خفيفة عبالك حتة ماتريدني اكعد وجايبتلي ابنها ميت عبالك اني اكدر اعيشة وهو ميت
يعني حياة المقيم الدوري تعبانة شنو مانسوي للمريض احنا مقصرين وما مهتمين
والشغلة اللخ هي انه من البداية ننترك لوحدنا بالردهات واحنا نحير بنفسنا والبورد لمن تصير مشكلة نخابرة .
ف هسة صرت اسال منا ومناك شون انطي الدم والبلازما وشنو الدوزات شون احسبها حسب الوزن
سلامي

هلو رشاوي شلونج ؟
يعطيج العافيه على جهدج وادري بيج شكيد حريصه وتعبين روحج على الشي
بس شوفي يعني مشكله مشكلتين بلشغل ويا اهل مرضى مو يعني نهايه العالم
يعني صح واحد ينقهر من يشوف تعبه يقابل بعدم تقدير بس بنفس الوقت انتي دتسوين شي انساني
وروحاني ,يعني تعبج كله يهون من يجيج واحد ويكولج دكتوره ينطيج العافيه ابني هسه احسن
وله واحد حس روحه على هاويه الموت وتساعديه يعني حتى لو ماقوبلتي برد فعل حلو من قبل المريض
رح تحسين انتي داخليا انه دتسوين شي زين مو بس شي زين دتسوين شي روعه وصدكي شكيد مسهرتي وتبعبتي
للمرضى مو قليل
احنه دخلنه الطب ونعرف شنو عواقيه,دخلنه الطب وببالنه ان ننقذ ارواح الناس,,مداتكلم عن الي دخل الطب بس على مود
الاسم بس الي حب يسوي شي لبلده ولشعبه وللناس بشكل عام
صدكي اني كان حلمي اخدم ناسنه,العراقيين وانشاءلله الظروف تسمحلي مره ثانيه وارجع اكمل حلمي
فلهذا كوني صبوره ووسعي بالج وانشاءلله خير
موفقه لوف
سلام

هلو فروحة
شكرا على كلامج الحلو
صدقي انه اهم شئ عندي انه ضميري مرتاح وماقصرت وسويت الي اكدر علية والبقية بيد اللة
بس من ناحية التعامل وية اهل المريض صحيح اكو اهل مثقفين حبابيين تحبين تحجين وياهم واهل تفضلين ماتجاوبيهم وماتنطيهم مجال ف هي شغلة نسبية
سلامي

سويت رشاوي
ادري بيج متقصرين ومينخاف عليج
سوي الي تشوفيه بمصلحه المرضى بدون متتعارض طبعا ويا مبادئج وحياتج
موفقه لوف

اكو انواع من المرضة و مرافقيهم اكو الحبابين و اكو المو خوش و انواع و اشكال مثل مدا اشوف هسة

الواحد يشتغل حسب ما يرضي ضميرة و ايخلي الله كدام عيونة و هي تصفة اهم شي ايكون ضميرك مرتاح من اتنام

و شكرا

شوشة هاي شنو مدا اعرفج عاشت ايديج يا وردة
اسمعي كلام فروحة تره كلمة رحم الله والديج توخر كل التعب
ويوم الي الج فروحة وترجعين بالسلامة