سلام
مثل ماتعرفون هالايام عدد الكبلات بالكليه في تزايد ملحوظ(تعرفون حريه وديمقراطيه)بس بدل مكنا نشوفهم بمكانات معينه من الكليه(يم العماده وبشارع التعارف)هسه صاروا كلش منتشرين!!واغلب ميوزات النادي محجوزه الهم(اكثر من ثلث الميوزه اذا مو نصها)هذا يعني انوو الكليه محتاجه ميوزه اكثر لأن خطيه الكروبات وين يروحون؟؟؟ومثل ماتعرفون ميوزه الكليه دائريه يعني تحتاج مساحه اكبر من المستطيله فلذلك نحن نطالب العماده(الي معودتنا على سرعة الاستجابه لكل طلباتنا!!)بجلب ميوزه مستطيله لكي تستوعب اكبر عدد ممكن من الكبلات والكروبات

طبعا اكييييييييييد هسه محد مفتهم اني بالضبط وين اريد اوصل؟؟؟؟ هسه راح اكللكم واني حبيت اطرح موضوع الكبلات بالكليه بس باسلوب شويه مختلف او كاريكاتيري(يعني لا اكوو مناقصه ولا يحزنون

من وجهة نظري انو الحب شي رائع وجميل ونعمه من نعم الله على البشر ومحد يكدر يكول غير شي لكن احنه نرفض انو يتحول نادي كليتنا وباسم الحب الى مكان مشبوه من جراء بعض التصرفات (الي ماعرف شلونها)الي ديسووها,,, ومو الكل طبعا اكوو ناس قمة الاحترام ويخبلون ...شكرا

)

[SIZE=7]حالة صحية وطبيعية ..الامان احسن..الدوام ديصير احسن ......الناس اللي دتجي دتتتشاوف وتتعارف وتحب وتنحب.....احنة بشر....

هاي حرية شخصية والصح والغلط شي نسبي لا اني ولا انت نكدر نحكم عالاخرين ......منو اني او انت؟......كل شخص حر بتصرفاته وماطول ما متعدي على غيرة فهو حر بنفسة ومسوول عنهة .....اني ارفض فكرة وصاية المجتمع عالفرد لان على مر العصور هالفكرة اثبتت فشلهة وقتلهة لكل ابداع او تطور......واذا كنت هيج صاحب غيرة على كليتنة فاعتقد هاي مسالة ثانوية ممكن تنتقدهة وما مسوية ذيجج المشكلة ......روح شوف الحمامات اللي ماليهة الوصخ وهاي احسن كلية بالعراق طلابهة ما عدهم حمامات ......روح شوف المناهج وطريقة التدريس اللي اني هسة يللة حسيت بفشلهة لان دا اقرة حتة امتحن برة ودا اشوف الامتحانات مال الخارج صارت مستحيلة بالنسبة النة مع العلم اني من الاوائل ......هاي فعلا مشاكل تاثر وتحل وتربط مو النادي وشديسوون بيه ....احنة لشوكت نبقة نهتم بهالسوالف اللي لا تدوي ولا تجيب؟....شلون حنتطور؟......والله ميصير براس هالبلد خير اذا مينسة هالحرافات مالته وهالتقاليد البالية اللي دمرتنة ....[/SIZE]

برأيي خليهم بالنادي احسن من يكونون بغير مكان
عالاقل كدام العالم والكل يشوفهم

وبعدين ما اتوقع اكو بيهم ولد او بنات صغار
يعني كل واحد مسؤول عن تصرفه
وبعدين اذا هيه او هو يعجبهم يسوون هاي التصرفات الي انته ضايج منها شكو مضوج نفسك؟؟

خليهم براحتهم
خلي الشعب يعيش

يمعود اللي مينوش العنب يكول عليه حامض

كل واحد و حريتة الشخصية بعد فما دام ما اماذي غيرة فما بيها شي

مرحبا جميعا

بغض النظر عن رأيي بالموضوع..او تعليقي على كلام الزملاء...اتصور هذا مو موضوع ممكن ينطرح بهالمنتدى...انطرحت مواضيع مشابهة عدة مرات..وغالبا ما ينتهي الامر انه التوبيك يغلق من قبل الآدمن(بسبب المشاكل الي تصير من ورا هيج مواضيع والاحتداد باختلاف وجهات النظر)...والآدمن مشغول هالفترة صارله هواية غايب عن المنتدى...والا اتصور جان وافقني الرأي(اعيد"اتصور"..مدا انصب نفسي اتكلم بالنيابة عنه)..وطبعا بالنهاية هذا رأيي الشخصي..واعتذر إف آي اوفينديد انيوان..وشكرا

كلامك صحيح عبداله لسبب واحد...
انو على كولة لؤي الكل كبار...لاالبنية صغيرة ومدتعرف هية شدتسوي ولا الولد..
بس احنا مشكلتنا انو منباوع على نفسنا ونشوف شكد مليانين اغلاط..ونركض عالناس
مابينا واحد مابي عيوب واخطاء..بس كدام الناس نسوي روحنا ملائكة..واكثرنا نكول (شعلينا بالناس خل يسوون اللي يسوو)وبظهرهم نحجي عليهم ونشهر بيهم...


الشاعر يكول
ابدء بنفسك فانهها عن غيها ...فان انتهت عنها فانت حيكم



شكرا عالموضوع

السلاااااام علييييييييكم وشلونكم شباب

اني عندي ملاحظتين عل سريع

اولا على الموضوع اذا ممكن ينطرح بالفورم فاني اشوف ممكن ومن حق اي واحد يطرحة لان المنع بس علة المواضيع الدينية والسياسية ومو بصالح الفورم نزيد الممنوعات بدون سبب والطرح ما تجاوز على احد مجرد وجهة نظر وانكااالت

ثانيا موضوع الكبلات همين اشوفة عادي وجزء من الحرية الشخصية على شرط ميتجاوز الحياء العام وكل واحد اعرف بمصلحتة وظروفة

وشكرا الكم

[SIZE=7]بصراحة اني اشوف انو ردود الجماعة بعض الشئ قاسية على نايس
يعني خلي نشوف هو شنو اللي معاجبه حتى نتناقش وياه؟
الاسلوب مال نايس ممكن بعض الناس تشوفه مضحك و ممكن البعض الاخر يشوفه استفزازي لذلك اني شخصيا كنت افضل الطرح بشكل اقل تهكمي مراعاة لمشاعر الاخرين

اني ابد ما اتفق ويه اللي كول الموضوع ما ممكن ينطرح هنا ليشششش؟ موضوع اجتماعي عادي و من صميم الحياة اليومية لبعض الزملاء و الخطا ابرأيي هو جهلنا لطريقة مناقشة صحيحة بدون اتهامات و بدون غلط و اني جنت حتى اتمنى انو الدين والسياسة نكدر نتناقش بيها بس مع الاسف قوانين الفورم تمنع اني اشوف العلم بشي خير الف مرة من الجهل به

يعني هسة مثلا الاخ عندة اعتراض او تساؤ لاو تعليق على وضعية الكبلات خلنسمع شنو اللي اباله حتى انراويه وجهة النظر المعاكسة عسى و لعل نزيد الوعي يم كل الاطراف و تتقارب وجهات النظر يعني اني اشوف قمة الفشل انو اني ما اكدر احجي البداخلي حتى الناس لتكول عليه كذا وكذا و فلان ميكدر يحجي اللي بداخلة لنفس السبب

يعني مثلا التعليق الاتي

يعني اني بصراحة ما يعجبني استخدام كلمة حرية وديموقراطية من قبل نايس لان اشوفها ساخرة و تهكمية و اطلاق احكام مسبقة
و بنفس الوقت اني ما اتفق وية نبيل في جوابه اني اشوف زياده عدد الكبلات مو طبيعية و قرأتي للموقف انو بسبب الظروف الامنية و حقيقة انو الوضع مو امان مثل قبل الحرب فماكو او وجود قلة لوسائل او اماكن التعارف الاخرى مثل النوادي و الزيارات العائلية
و همين اشوف بسبب عدم وجود وسائل التسلية الاخرى من اماكن للرياضة و الاسواق و المولات و السينمات و المسارح او سفرات او اي فعالية الناس اللي بعمرنا ايسوهاباي دولة الله راضي عليها هذا كلة خلة الكلية و من ضمنها موضوع الكبلات ياخذهذا ا لحيز الكبير باعتباره المتنفس الوحيد او واحد من المتنفسات لقليلة الموجودة


احترامي و تحياتي للجميع
فرح بهاء

مرحبا جميعا

اولا اني بعدني ما اريد ابدي رأيي عن موضوع النقاش الاساسي وهو الكبلات وما الى ذلك..بس عجبتني جملة كالتهه فرح

هي هاي المشكلة..اني شايف هواية فورمز..مو بس اجنبية..بل حتى عربية..تتناقش بيهه اشد المواضيع حساسية نقاش موضوعي وبدون تعدي وبدون تجريح..بس هذا الشي صعب يصير بمنتدى كليتنا..مو لقصر بمنتدانا وانما لأسباب ثانية ما اكو مكان لذكرهه بهالتوبيك...ربما بتوبيك ثاني عن الفورم نفسه...بس المختصر...انه يجوز الموضوع يبين بعيد عن الدين وبعيد عن السياسة...بس اذا لاحظتوا الي صار بمواضيع ثانية نوعا ما مشابهة...انه ورا فد عشر ريبلايات ينكلب الموضوع كليته الى ملحمة..ويدخل الدين..وتدخل السياسة...ويضطر الادمن يتدخل

اني لتتخيلوني دا اصير عكرة بطريقكم ودا اريد ابطل واهسكم...بالعكس..اذا كدرتوا تكملون بهالموضوع بنقاش هادئ وحلو فآني اكثر واحد يشجع هالشي...وبلكي نكدر بعدين نقترح انه اصلا نشيل الرول الي تكول ماكو دين ولا سياسة بالمنتدى الي مضوجة البعض...بس اذا كدرنا نثبت انه نكدر نناقش هيج مواضيع نقاش موضوعي

بس فور ناو..اني مشايف هيج مؤشرات(وعذرا..مدا اقصد اي احد سبيسفكلي..بس متعرف منو ممكن ميتحمل يضبط اعصابه ويبدي يتجاوز حدود الموضوعية بالنقاش)..ففور ناو..ارجع واكول اني اقترح(مجرد اقتراح...لا دا ازيد الممنوعات ولا دا انقصهه...اصلا مو بكيفي اني اصعّد وانزّل وانتو تعرفون هذا الشي)انه الابتعاد عن هيج مواضيع ربما يكون افضل..ومو شرط يكون رأيي صحيح..فاذا تتصورون انه اني غلط...فانسوا كلشي كلته..وكملوا بالموضوع طبيعي...وبرووف مي رونغ

واعتذر

اني ماريد اكتب هوايه لأن حاعيد نفس الكلام اللي كالوا اللي قبلي بس اكو شغلة وحده بس اريد اعلق عليها وهي كلمة مشبوه بالبوست مال نايس من قريتها كلش جذبت انتباهي ولسبب بسيط انه هي كلمة شويه وقعها قوي ومأتوقع راهمة بالجملة
اللي اريد اوصله هو: معقوله اللي ديصير بالنادي غير اخلاقي الى هالدرجه بحيث ينوصف بمشبوه؟؟؟ اني صحيح صارلي سنتين مشايف الكلية بس يعني شنو اللي حيصير ؟؟ يمعود نايس تره عيب والله. اني ماعرف انت او انتي منو بس تره هذا الحجي زايد عن حده وتعدي غير مبرر على حقوق الآخرين. انت شعليك؟ يعني هسه اذا تريد تبدي استيائك اوكي بيها مجال بس مو تروح زايد وتتعدي وتوصف الشغلة مشبوهة

المفارقة انه ماكو احد اعترض على المدخنين اللي ديأذون غيرهم ويتعدون عالمصلحة العامة بصوره مباشره ومثبته علميا بس اكو اللي ينتقصون من الكبلات اللي متأذي القريب او البعيد !!!!! عجيبة

و فرضا حتى اذا اكو فد شي محلو ديصير او مشبوه علنا حسب ما سميتوه فهمة مسؤؤلين عن تصرفاتهم بس ابصراحة اني العام اتخرجت ما اتذكر شايف هيجي شي بنادينا و اظل و اكول كل واحد و حريتة الشخصية

اما على موضوع النقاش بالعكس هو الشي الحلو بان الكل تتناقش باسلوب حضاري و تكدر اتوصل الفكرة الي اتريدها بدون تجريح لاي احد حتى لو اكو اختلاف ابوجهات النظر

هاي حجايتك ذهب وصدك صحيحه

وعن الشغلات الي يسموها مشبوه ههههههههههههه فأكثر شي اني شايفه بالنادي العام هو واحد حاضن وحده كاعده يمه او يكرصها من خدها
هاي علمود اخليك في قلب الحدث الي انته بعيد عليه صارلك سنتين

بس هاي الحوادث العام شفتها وهالسنه تخرجت فما اعرف هالسنه شصار
يا ريت لو واحد اللاخ يخلينا بقلب الحدث

هلو شباب وبنات شلونكم ؟؟؟ اتمنى تكونو بخير يا ربي

اني صارلي فترة غايب و هسه شفت هذا الموضوع الحلو او اللي ممكن نسميه الاصطياد بالماء العكر

لاول مرة بهذا المنتدى اني اتفق ويه نبيل و فرح و محمد
حبيبي انت ليش مضوجيك الكبلات ؟؟؟ ليش تعتبرهم فد شي مشبوه ؟؟؟ ليش متشوفهم على انو هم طيور حب
بس هو الإناء ينضح بما فيه هاي اولاً
ثانياً ... شنو كلمة مشبوة ؟؟؟
اعتقد حضرتك تحتاج تراجع نفسك من جديد والاف المرات قبل كتابة مثل هيج كلمات جارحه و مو بمحلهه
اعتقد الكلية اللي انت بيهه مو مكان مشبوة ولا زملائك ناس مشبوهين

وبعدين .... صحيح اني متخرج وصارلي هواي منقطع عن الكليه وأخبارهه ... بس أعتقد انو اكو هواي اشياء تستحق الانتقاد اكثر من الكبلات
مو لو مو مو ؟؟؟
وبعدين يا عزيزي الكبلات مو بس بطب بغداد بس بغير كليات ... واني ما اعتقد هذا الشي متخلف لو رجعي بل اللي يفكر العكس هو رجعي و متخلف

بابه خلي الناس تعيش حياتهه بدون تعقيد وبدون انتقاد
على اي حال اني أحيي الزملاء اللي اتفق وياهم واللي ما اتفق وياهم
بس اللي ارجو منك هو الانتباة قيل كتابة بعض الكلمات مثل مشبوة او غيرهه

.... و
Viva for couple .... viva for love ....

Best Regards.

Samer S. al-Obaidi,M.D
M.B.Ch.B