مساء الخير
حبيت اشاركم بموضوع انطرح اليوم بالكليه عن مصروف البيت بعد الزواج ومنو ممكن يتحمل تكاليفه او يشارك بيه؟؟؟
واتفاجات من بعض الاراء الي انطرحت لان حسب ماافهمه الحياه مشاركه خصوص اذا يكون الطرفين دكاتره يعني على مستوى كبير من الثقافه والفهم لطبيعه الحياه

اتفاجات انو معظم الاراء كانت تستهجن فكره مشاركه المراه بمصروف البيت وبرر البعض اراءهم من انو مساهمتها بتكاليف البيت الماديه راح يعلي كلمتها وهيكون هناك قائدين داخل البيت وهذا شي يمس مكانته ورجولته وممكن يفقد احترامها اله

والبعض الاخر كان اكثر رومانسيه بالطرح ولو المضمون واحد كال انو السعاده الحقيقه بالنسبه اله هو انو تعيش وياه هي على الحلوه والمره بالمستوى الاقتصادي الي يكدر يوفره الها وهذا يخليه ميتقبل شي من راتب زوجته الا لو كان هديه بس ان تصرف على البيت فهاي من مسولياته هو

وهذا كان اراء معظم الموجودين ولهذا حبيت اسمع منكم سواء شباب او صبايا
الشباب حول تقبلهم لفكره انو زوجته تتصرف عله البيت حالها من حاله

والبنات حول نظرتهم للرجل الي يتقبل منها او يطالبها براتبها وهل هذا فعلا ياثر على احترامها اله وعلى مكانته عندها وهل فعلا راح يتغير سلوكها داخل البيت اذا كانت هي المسووله عن تكاليف البيت الماديه

ياحبذا لو نتامل الموضوع بعيدا عن الاراء المثاليه اريد اسمع الي في دواخل نفوسكم كبشر نملك صفات سلبيه وايجابيه وسلوكيات مختلفه وهم بلا شرقي وغربي بلييييييييز

بالمناسبه عله ذكر الرواتب وباعتبار اكو ناس تعينت شكد صار راتبنا وره الزياده المرتقبه؟؟؟

السلام عليكم
موضوع حلو

اني اشوف الحياة مشاركة والحياة الزوجية بالذات مثل مة كلت ان يكونون سوة على الحلوة والمرة.ان يطالبهة اشوفهة غير ملائمة بس لو وحدة هي بقناعتهة اشوفهة اكثر راهمة

عن نفسي مستحيل
تحياتي

مرحبا
عاشت ايدكم عل موضوع الحلو شوية بلكي يسوي حركة بالفورم
اني اشوف كل حالة زواج الها وضعها الخاص , يعني ممكن يكون الزوج متمكن جدا وميحتاج مساعدة الزوجة ( وهاي ميمنع الزوجة من حق العمل طبعا اذا رادت لان هذا حق الها اضافة الى انه هو وسيلة تحقيق الذات وضمان لمستقبلها مهما كانت الظروف )
وممكن يكون الزوج متوسط الحالة ويحتاج مساعدة زوجتة اذا كانت عاملة لان اكيد الحياة صعبة والمثل يكول الايد الوحدة متصفك ( اما حجة انه هذا ممكن يعلي كلمتها بالبيت بمواجهة الزوج فهي بكل الاحوال لازم يكون الها كلمة سواء كانت تشارك بالمصروف او لا لانه هية جزء من منظومة الاسرة مو موظفة تعمل عند الزوج )
اما اذا حالة الزوج كلش صعبة وهية تصرف كل الصرف عل بيت فاكيد هاي تخلق عدم توازن ومشاكل هواية باغلب الحالات ...
بقت شغلة وحدة من ناحية دينية الزوج هو مكلف بكل مصاريف الاسرة والزوجة والاطفال وما مطلوب من الزوجة المشاركة لكن هذا ميمنع ان تشارك وحسب الظروف
اسف اذا طولت عليكم وشكرا

Hii...
nice topic to discuss ...
I think that marriage means sharing in everything, so both should participate in everything,esp in our days where it's hard for the husband only to take care of it all...if we were in the past time ,it was an easier thing with less needs..but in our time ,it's getting more sophisticated ..&since most females now have a college degree &already work after graduation ,so why don't they keep on doing that after marriage?
&'bout changing her behaviour inside her house bcuz of that..i think it depends on her personality ,but she doesn't have the right to do so....

that's my opinion&thx again for the topic

الموضوع صدك يستحق المناقشه
اول شي خلأتكلم عن وجهة نظري.اني شخصيا مو بس مامانع وانما افضل انه زوجتي يكون عدها وظيفة ثابتة وتشارك ماديا بمصروف البيت. يعني اذا هي متريد تشتغل مو معناها اني راح اجبرها بس اللي اقصده اني اتمنى ان تكون زوجتي من النوع اللي تحب تشتغل وتفرض نفسها كجزء من الحياة الزوجية سواء ماديا او معنويا او من ناحية القرارات والمسؤوليات.
بالمقابل اني ما عندي اي مانع انه اشارك بالاشغال المنزلية ايا كانت من التنظيف الى الطبخ الى غسل الهدوم مادام الجهد متقاسم بين الطرفين وحسب الظروف اليومية.

مادري بالضبط شنو هو السبب اللي خلاني افكر هيجي تفكير واللي خلى رأيي يكون شاذ عن التيار العام بمجتمعنا بس عالاكثر هو مسببين الاول هو رد فعل عن واقع مجتمعنا المأساوي فيما يتعلق بدور المرأة ومعاملتها والثاني هو كوني مؤمن بشدة بتساوي الرجل مع المرأة في الحقوق والواجبات وعدم اعتقادي بأنه الشغل والصرف واتخاذ القرارت هو من صفات الرجل او انه العناية بالاطفال و الطبخ هي من صفات المرأة.
يعني اللي اقصده بالضبط انه ابد مأنظر للمسألة كتابع ومتبوع او قائد ورعية .

وهم يعجبني انطي كم ملاحظه على الرأي العام بمجتمعنا. الشغلة بديهية البنات او الولد بمجتمعنا على حد سواء مبرمجين ثقافيا من خلال العادات والتقاليد والفروض الدينية مبرمجين ثقافيا على عدم موافقة معظمهم على شغل المرأة وصرفها بالبيت . هاي الشغلة بدمهم ميكدرون تغييرها. من همه صغار همه يعيشون ويسمعون هذه المواضيع ومن الصعب تغيير تفكيرهم بفتره فصيره. مجتمعنا خلانا ننظر الى المرأة كأنها ادنى عقليا واجتماعيا عبالك انه المرأة متكدر تعيش بدون وجود رجل بجانبها ان كان زوج او اب او ايا كان وكانما احنا عايشين بالعصور الحجرية ويه الحيوانات المفترسة ومأعتقد هذا الشي راح يتغير لأن هو مجتمعنا بدائي ومفترس !!!
مجتمعنا خلانا نعتقد انه الرجل المثالي هو اللي يقود البيت ويتخذ القرارات ويتحمل كل االمسؤولية واللي يتخبل من يرجع للبيت ويشوف مرته ممحضرة الاكل او طالعة من غير متكله .
هاي السوالف انطبعت بأدمغتنا وصارت هي الصحيح واي انحراف عنها حيكون نقصان من رجولة الرجل .

وكاتب الموضوع يأكد كلامي بذكره آراء الشباب بكليتنا بأنه همه ميريدون قائدين بالبيت وانه ممكن يفقد احترامها اله عبالك هي المرأة متحترم الرجل غير بس على صرفه وشغله. واللاخ ابو السعادة الحقيقية ولازم تتقبل الحلوه والمرة يعني اذا هي تشتغل وتزيد دخل البيت شكو بيها؟؟ وحتى اذا فد يوم من الايام صار طارئ طبي او السياره عطلت وكالها محتاجين جم فلس من راتبج او يابه هالشهر انتي دفعي فلان شي وفلان شي وين المشكلة. و حتى لو افترضنا اذا تغير سلوكها ونظرتها اله شنو يعني بدل متنظرلة كجامبو الجبار اللي بدونه متكدر تاكل وتشرب وتلبس خلتنظر اله كشريك حياتها اللي تحبه وتعاشره وتتقاسم ويها الجهد المبذول والمال المصروف. شنو يعني هذا السيناريو هل هو بحد ذاته فد كارثه؟

WELL I FIND THAT BOTH MUST SHARE THE HOUSE RESPONSIBILTY IN EVERYTHING , WITHOUT CONSIDERING THAT THIS IS MY MONEY OR URS,

ALI

عاشت ايدك عموري على هاي الحجايه

اني هم افضل ان تشتغل وتشارك.. بس طبعا الرأي الاول والاخير من ناحيه الشغل الها

سلام .... الموضوع حلوو عاشت ايدك يابريشس واسمحولي انو اكول رأيي بالموضوع..... اتمنى انو نتجاوز مرحلة هو وهي وننطلق نحو الواحد الانساني الزواج مشاركه وتعاون قائم علىاثنين والحب اسمى من ان ننظر الى من سيقوم بتحمل المصاريف ولكن تبقى كل الاراء الي نذكرت هي اراء نظريه وما نكدر نعمم قاعده عامه للكل فلكل عائله ظروفها ومتطلباتها اما بالنسبه اليه فاشوف بانو الشخص الي أتمنته على حياتي كلها يستحق مني ان اائتمنه على المال وهذي الاشياء الثانويه مادام هو شخص يستحق هذاكله واعتقد بانو المرأة ماممكن تبخل باي شي اذا حست انو الزوج مقدر,,وتبقى المرأه محتاجه للرجل يحميها ويصونهاحتى لو كانت هي الي تتحمل الامور الماديه هذا هو النظام الطبيعي الي نخلقنا علي ومنكدر نغيره يعني ماعتقد انو هي ممكن تغير من نظرتها او احترامها لزوجها لمجرد انو هي تساعده واسفه على الاطاله

لو تاملنا واقع الطبقه الوسطى من المجتمع العراقي هنشوف انو معظم العوائل بيها المرأه عامله موظفه وعدها راتب وبالتالي تتحمل جزء من تكاليف البيت الماديه سواء شاء الرجل ام ابى
وحتى نكون منصفين اكثر المرأه العامله بالمجتمع العراقي محترمه جدا ولاتعامل بازدراء ابد سواء داخل البيت او حتى من المجتمع ككل

وهناك توجه عام نجده حتى بين الفئات الاجتماعيه الاقل ثقافه حول الزواج من المرأه الموظفه ولاسباب اقتصاديه بحته حسب المثل المشهور ( اذا الدهر وازاك خذلك معلمه هم راتب صغيرون وابنك تعلمه )ا

القصد انو الزملاء اصحاب الاراء الي ذكرتها في بدايه الموضوع هنشوف انو اراءهم هتتغير على المستوى التطبيقي بالمستقبل المنظور لكن المؤلم هو النظره العامه لعلاقه الرجل والمرأه ضمن منظومه الاسره هاي النظره الي سمعتها من قبل طبقه تعتبر ارقى الطبقات الاجتماعيه اطباء المستقبل والي اعتقد انو الزميل محمد حاتم وضح الصوره بشكل لايحتاج الى ايضاح ولو كان شديد القسوه بعض الشي
هذه النظره حول انو الرجل هو الامر الناهي المالك لكل شي الي ميصير احد يكله لا او يعارضه لان الكل يخاف منه ويخاف انو يقكع المصروف عنها

كلام واقعي فعلا لكن نقص الثقافه مع الاسف عند الطرفين حول طبيعه العلاقه الزوجيه قد تولد ردات فعل عند المرأه وبالتالي نشوفها احيانا خصوص اذا كانت مسووليات البيت الماديه عدها يبدي يتغير سلوكها وتحاول تمارس دور التسلط واحيانا تتقمص دور الرجل بالامر والنهي ولو هاي امور نسبيه تتغير من امرأه الى اخرى حسب شخصيتها وثقافتها

لكن بشكل عام نحتاج ان نفهم كل منا قدسيه هذه الرابطه والالفه والمحبه الي المفروض تسودها ويامحلى المشاركه بكل شي كل واحد بالي يكدر عليه وانو المرأه انسانه تملك مؤهلات مو بس على مستوى جلب المال ولو هذا هو موضوع نقاشنا بس هم هي عقل بشري عنده افكار واراء بالحياه وقدره على اتخاذ القرارات الي قد تكون افضل وارقى واكثر حكمه من اراءه هو كرجل

شكرا الكم واراءكم فعلا تدعو للارتياح

ولو محد جاوبني لحد الان على السؤال الجوهري والمهم شكد صار راتبا بلا زحمه حتى واحد هم يحسب حساباته ه ههههههههه