صفينه إيدنه ويه الگاع .. حتى الگاع ملـّت من خطاوينه
وصفينه ركام يا مهيوب إسمك .. ليش تريد تمسح كل أسامينه ؟
وصفينه إيد تلوي الإيد .. بعد ما حار الوكت شلون يلوينه
وصفينه الدم للرچاب يسيل .. بكل بيت الچفن حضرناه أخاف الموت يلفينه
وصفينه من الغروب إنـّام .. بعد ما چانت سهر كلها ليالينه
وصفينه نگول للي يموت روح إخّلص .. من قهرنا ومن بلاوينه
وصفينه بالتفگ متحزمين .. بس نكتل بعض والموت حادينه
وصارت كل مدنـّا گبور ظلمه .. ونلبس بس سواد شوكت ما جيت تلگينه
وصفينه عالهويه نذبح الجيران .. ولا چن سنين الحلوه وياه گضينـّه
وصفينه نخبط الصافي بنهرنا .. الما صفه فد يوم طينه
وصفينه نعيد بالتاريخ .. و لعصر الجاهليه اليوم ردينه
ولا جنـّه أول حضاره صارت على الگاع .. ولا چن أول مسلـّه إحنه سنـّينـّه
ولا چن حكمنا الدنيا من بغداد .. ولا چن المنايا تخاف لو سمعت بطارينه
ولا چن گبل واحدنه من ينضام .. يفز الگلب من حشاه ويعينه
شجــــــــانه اليوم بس كاتل ومكتول .. ولا رحمه بگلبنا گلي شبينه ؟
نبوگ من الليالي مسامر الخلان .. ونگطع وصل حبهم من شرايينه
نحرّم كل ترافه تخطر على البال .. و ندندن صرنا بالبسكوت أغانينه
وصفينه كلــشي ما حاوين لا حاضر جديد .. ولا ماضي قديم اللي يواسينه
نهاجر نكَول بلكي يهدّه البال برّه .. وتتحقق امانينه
ومن نفرح غفُل نبجي بدمع مهضوم .. لان فرحتنا تغّص بكل مآسينه
جاوبني يالعراق وكَلي : ليش هيجي صفينه ؟؟؟

عاشت الايادي

No words can describe it

GOD bless Iraq

Thaaaaaaaaanks Ahmed

well i'm so touched..

thanks for sharing

خجل حتى الوطن من شافنه ابها لحال ... مثل والد عليل اتعاركو ولده

ياجار اليحشمه اويدري بالجيران ... متحزمه عليه اوتشتغل ضده

اذا مايهده تهده اوتفرح اوترتاح ... اوماتهده دقيقه من تلوضع يهده

باوع علدول والناس وصلت وين ... وحنه ابهلخلاف انجيبه ونرده

مسرحنه انعرف وشتهروا الابطال ... مخطوف اوشهيد اولازمه العده

اومجهول الهويه اوجسد مابيه راس ... اومفجوعه ابولدهه اوتصرخ ابسده

مسكين اليتيم ايمر عليه العيد ... ودموعه فواتح ناصبه ابخده

گلي ابيا ذنب كتلو ابوه اوليش ... كوم اعيال عده اوكلشي ماعده

اوگلي ابيا بخت جابوه ابغير ازنود ... للجابت عمرهه امچلبه ابزنده

جرحك مثل جرحي اوبلوتك بلواي ... وصوابك اصوابي اشلون ماشده

ناوشني المحبه اوبوسة التجبير ... خل نگطع نزيفه ابلسم الوحده

اشگد مشتاگ امر للاعظميه اليوم ... والنعمان ازوره اويمك اتغده

اونعبر عالجسر نتمشه ايد ابأيد ... يم باب الحوائج غيضنه انهده

لاخير ابوطن ماتغفه عينك بيه ... و لاخير ابشعب مايعبر الشده

منقووول