well dr. farah i will ask you my answer is from book i read titled ((the happiness is an internal act)) in arabic السعاده تنبع من الداخل
يكول بي جمله لمن قريتها لي هسه دا افكر بها وهي
((((( لنجعل السعاده طريقنا وليس هدفنا )))))
فكري بيها وراجعي نفسج لأكثر من مره اكيد رح تفتهمين شيقصد الكاتب
وشكرا
SAFA- 08-09-2008
Great way to put it Dr.precious , really liked ur post ..i think there's nothing left to say , u really said it all , at least that's for our "optimistic" group .. tc
precious- 08-11-2008
مساء الخير شكرا د.فرح و د.صفا هي مو مقترحات بس اني عندي طلب بصراحه جان في بالي فكره اسوي موضوع او تقرير بالفورام عن نظام التدريس في كليه الطب بس انصدمنا بواقع قصر العطله وتعب دوام الصيف اضافه الى انو اني مو خبيره بشؤون الحاسبه والنت يعني لااندل مواقع زينه ولااعرف شلون اطلع منها مواضيع
ولهذا اتمنى لو احد الزملاء يتبنى المساله يسويلنا فضل يعني فد موضوع عن ا_نظام التدريس في كليتنا سلبياته وايجابياته ا2_نبذه عن انظمه التدريس في الجامعات العالميه ا3_وجهه التشابه والاختلاف مع نظامنا ا4_المطلوب من الاساتذه والطلاب والجامعه والدوله لاجل التطوير ا5_الاشياء الي بالامكان البدى بها وتطبيقها بالعراق بحيث تحدث الفارق
الموضوع قد يكون جبير ومتشعب ومتعب الشغل بيه بس حتى لو فد شي بسيط ومختصرات عن اهم الاشياء عسى ولعل حتى لو مكدرنا نغير لكن على اقل تقدير نخلق فد قاعده للتغير يمكن في يوم تجينا فرصه ونكون في موقع يسمحلنا ان نغير
شكرا تحياتي
m7md7atem- 08-12-2008
QUOTE (Dr.Leo1984)
تنتهي بكرعه وبدون وصول الى حل
مدافتهم شنو قصدك بحل ؟ شتريد نطلع قرار جمهوري ؟ وثانيا ليش كل نقاش تعتبره عركه؟ يعني الا الكل يتفق على رأي واحد وكله عيني واغاتي وحبي ؟ انت يجوز متفائل ميعجبك تناقش وتعرض مشاكل وتعتقد انه احنا من الافضل نعتبر السعاده طريق وهذا من حقك ببنما اني عكس هذا الشي طاكة روحي من الوضع ومراضي على حالة المجتع والبلد بصوره عامة وهذا شي من حقي
QUOTE (Dr.Leo1984)
هذا كلامك واضح وصحيح ومفهوم.. بس شنو علاقته بموضوع النقاش
الحجي مالتي جان تعقيب على كلام حمودي وتكدر تشوف الكووت مالتة فوك كلامي مباشرة عدا ذلك انت لو تنتبه على بوستات فرح ومحمد ونبيل تشوف انه نطاق الموضوع اتسع من كونه عن الاجيال الى موضوع يغطي تطور المجتمعات بصوره عامة ومشاركة الشباب بيها. واللي اني حجيته هو جل الموضوع. يعني من اشوف العالم ديتطور واشوف ماليزيا وايران وتركيا وتايلند تصنع سيارات والهند تدز اقمار صناعيه واشوف بلدي طايح حظه كهرباء ما بي ووره كل هذا اشوف ردود منك او من خالد او غيركم تكولون خلي نخلي السعاده طريقنا مو هدفنا و التطور مو كل شي وهي تصفه وره كل هذا متريدني اتنرفز؟ من اشوف خيرة شباب بلدي مثلك مضايجين من الوضع ومن حالة بلدهم متكلي شلون حنتطور ؟ اني مدأكول اذا محمد حاتم او فرح بهاء او نبيل رعد او محمد جعفر ذكروا هذا الموضوع فهذا معناه بين ليلة وضحاها كلشي حيتغير. الي اكولة اذا متغير تفكير الشعب كلة فمراح نتقدم علميا او اقتصاديا او سياسيا او اجتماعيا وهذا التغير هو بالدرجة الاساس مسؤولية الجيل الجديد جيل الشباب
QUOTE (Dr.Leo1984)
احنا نريد نحل او نناقش موضوع مو نتعارك اوكي ؟؟
رجاءا مرة اللخ اريد اكلك تره هاي مو عركة هذا يسموه اختلاف بوجهات النظر ونقد. يعني اني هسه بكلامي انتقدت وجهة نظرك ويجوز بحده بس هذا اني ماعتبره عركه لأ. مادام اني متطاولت عليك او تعديت حدودي فهذا نقاش ونقد تره المجتمع المتقدم الديمقراطي مو معناه الكل متفق على رأي واحد وانما بالعكس يكون متكون من ليبراليين ومحافظين من علمانيين ورجال دين وكلمن عنده آراء مختلفه بس ميخلون الاختلاف سبب للاقتتال
noor a. r- 08-12-2008
الفشل كلمة كبيرة ومن المستحيل تعميمها على جيل كامل لأن لولا وجود الفشل ما أنعرف النجاح جيلنا غافل ومنجرف بتيار الهوى كل منا عنده أساسيات ومبادئ وأفكار مختلفة لكن نتفق في أن كل منا يطمح في تحقيق ذاته ومجده الخاص هذي المبادئ ثابتة بكل جيل لكن طريقة الحياة أتغيرت ومتى ماوعينا و حددنا أهدافنا حننجح ونكون جيل ناجح
doddi- 08-12-2008
كمختصر شديد كلش
للعلم لا عبالك يا عزيزي محمد حاتم اني عاجبني العراق و عاجبتني وضعيتة بس اني ابطبيعتي متفائل دائما و لو امل التقدم عدنا كلش ضئيلة
تدري ليش؟؟؟ و لو اني ما اريد اجيب طاري السياسة ابد بس احد اسبابها الانظمة السياسية في كل الاوقات الي دائما اتعيق تقدم البلد و ابسط شي وجود المناصب لالاشخاص غير المناسبين و كلها بوك و فساد اداري و اذا اكو واحد شريف راسا ايحاربوه ما اتكلي اشلون نتقدم اذا بلدك لمة مال حرامية و عصابات و السبب المهم الاخ معظم شعبنا درجة الوعي مالتة كلش قليلة و ضحلة هم اشلون اتريدنا نتطور و احنا ترى قلة ما نطلع عشر و ايجوز اقل من هذا الشعب المو واعي و التعبان
و يا يرشيوس حجيك حلو و على راسي احنا صح كلنا ما متحركين بس كلي الواحد شيسوي من شعب متخلف و موجود منهم ابكثرة و اكو شغلة ذاكرها قبل بان العوائل المثقة ما اتخلف بس 3 بالزايد 4 بينما هذولة المتخلفين اقل شي 7 و ايوصلون حتى 10 شوفوا اشلون نسبة مخيفة بالمستقبل و ابصراحة اني اعتبرها كارثة لان زيادة بعدد المجرمين و عدد الناس الي وعيعهم قليل
احنا بلدنا وضعيتة مو طبيعية ابد لو جانت وضعيتة طبيعية و وجود الكفائات في الاماكن المناسبة و اكو خوف الله جان اتقدمنا مثل ما جنا بالسبعينيات اكثر بلد متطور بالشرق الاوسط و بالوطن العربي هم
الله كريم
medicalboy- 08-12-2008
هلو صارت هواية ردود وصارلي ساعة دا اقرا الردود لول
اولا اني ما اشوفها عركة ولا تفاؤل وتشائم ,بباسطة كل واحد ديكول اللي يشوفه واللي هو يمر بي ببلدنا
بالنسبة لكون النقاش حلقة مفرغة ومابي فايدة لو بي بس حبيت اكول للي يعتقدون انهو جيلنا مو فاشل او (المتفائلين) شفتولكم فد يوم عراقي اقتنع بكلام صاحبة ؟؟ اني واحد من العراقيين ودا اريد ابطل من هاي العادة بس متصورون المعاناة من اريد اكول لصاحبي انتة صح واني غلط.........هاي طبيعتنا ومنكدر ننكر هذا الشي
حبيت بس اسولف بعدة اشياء
QUOTE
[SIZE=7]ذوله ناس متعلكين باذيال صدارينا حتى نغيرلهم وضع ونصنعلهم حياه حلوه
شلون يكدرون الاطباء يبنون البلد وحدهم؟؟ كلش اختلف اني اذا مو الكل يشارك المثقف والجاهل , الطبيب والفلاح ,والمهندس والعامل الكل بدون استثناء يكلك ((اذا الشعب يوما اراد الحياة )) مكال اذا الفرد او اذا الطبيب او اذ المثقف لازم الكل
كلش عجبني سوال hourglass للمتفائلين عن شلون يطبقون هذا الحجي بالريالتي ؟؟؟
QUOTE
جان في بالي فكره اسوي موضوع او تقرير بالفورام عن نظام التدريس في كليه الطب
بمناسبة نظام التدريس د.بريشس انته محسوب وية المتفائلين صح؟ سؤال الك ولكل المتفائلين؟ تكدرون توضحولي شلون بالضبط جيلنا مو فاشل واحنا عدنا بالسادس اعدادي 40 يوم تحدد مصير الطالب الى حد ميموت؟؟ اربعين يوم بس !! يعني الطالب حتى لو فد مرة واكع وسختجي .... يحط خصوصي بالعطلة الصيفية ويتعب روحه بالاربعين يوم وصارت الطبية مضمونة ...زين شلون ينبني البلد اذا صار الكل يقدم على الطبية بمجرد انهو معدلة عالي ...يعني استمارة القبول مال اغلب الطلاب هي كالاتي طبية اسنان صيدلة هندسة الخ
جيلنا تعلم انهو من تروح تخطب بنية شكبرها من تكلهم اني طبيب ؟؟ وشصغرها من تكلهم اني خريج علوم ؟ هذا هو جيلنا شلون يكون جيلنا ناجح وطموحنا معدوم , يعني بالخارج تلكى طالب خرافي والاي كيو عالي وماكو شي ميفتهم بي ويصيرلك صحفي لو عالم لو كاتب لو الخ
شلون ينجح جيلنا اذا اغلبية المثقفين يروحون مجموعة طبية ؟؟ زين احنا منحتاج المهندس ؟ ابو العلوم ؟ ابو اللغات ؟ابو الزراعة ؟ ابو البيئة ؟؟
اما عن مبدأ السنفرة فهو اكو نوعين الاول اذا انت صاحب مبدأ ومستعد تعيش بالبلد مهما كانت الظروف فأبقى
اما اذا ردت حياة افضل بنظام وتطور (فلا تقشمر علي ولا اقشمر عليك) سنفر
شلون يكدرون الاطباء يبنون البلد وحدهم؟؟ كلش اختلف اني
استخدمت الجمله لان الي دا احجي وياهم كلهم اطباء وهم لان نمثل خيره شباب البلد وبعدين هيه جمله مجازيه استخدمتها لشحذ الهمم مو اكثر يعني مو فد شي ليش شنو مقاري هيج شي بالادب ؟؟
هي مو مساله محسوبه على جهه متفاءله او لا بس يعني الي يريد يشتغل ميبدي وهو محبط ويائس لان مراح يوصل لشي اصلا مراح يعرف شلون يشتغل اذا هو هيج ماعنده امل راح يكعد بس يندب حظه وهذا الي استهجنته من الشباب انو بس سب وشتم بالاوضاع واخيرا قررو الهروب
QUOTE
تكدرون توضحولي شلون بالضبط جيلنا مو فاشل واحنا عدنا بالسادس اعدادي 40 يوم تحدد مصير الطالب الى حد ميموت؟؟ اربعين يوم بس !! يعني الطالب حتى لو فد مرة واكع وسختجي .... يحط خصوصي بالعطلة الصيفية ويتعب روحه بالاربعين يوم وصارت الطبية مضمونة ...زين شلون ينبني البلد اذا صار الكل يقدم على الطبية بمجرد انهو معدلة عالي
...
ليش العفو اني جنت دا ادافع عن نظام التدريس عدنا مو دا اكلك انت تقره البوستات بطريقه غريبه متصدكني هههههههه
اني جان عندي رجاء واحد يسويلنا موضوع يتعب عليه شويه لان اني مشغوله نوعا ما وهم لان عندي شويه تخلف بشغله النت مااعرف شلون استخدمه بصراحه يعني حتى نطلع على طرق التدريس المتطوره بالعالم ونحاول نسوي قاعده للتغير ومشوار الالف ميل يبدا بخطوه
مديكل بوي لاتزعل علي ده امزح معك
تحياتي
medicalboy- 08-13-2008
QUOTE
مديكل بوي مااعرف الصراحه اشو ماادري شلون ده تقره البوستات
هههههههه لا ابدا هسة اوضحلج
QUOTE
QUOTE شلون يكدرون الاطباء يبنون البلد وحدهم؟؟ كلش اختلف اني
استخدمت الجمله لان الي دا احجي وياهم كلهم اطباء وهم لان نمثل خيره شباب البلد وبعدين هيه جمله مجازيه استخدمتها لشحذ الهمم مو اكثر يعني مو فد شي ليش شنو مقاري هيج شي بالادب ؟؟
لووووول شكد ماخذة بالعربي بالسادس اعدادي,, اني ماخذ 99 ههههههه لا جذب دا اتشاقة بس باوعي المسج مالتج كاملة
QUOTE
ماانتظر ابو المخظر لو ابو الغاز الحاير بلكمه جهاله يصنعلي وطن ذوله ناس متعلكين باذيال صدارينا حتى نغيرلهم وضع ونصنعلهم حياه حلوه
وين المجاز ؟؟ انتي دتكولين ما انتظر ابو الغاز وابو المخظر ووووو ,,وبالبوست مالتي كلت انهو اني اشوف انهو المثقف والجاهل عليهم نفس المسؤلية (اذا الشعب يوما اراد الحياة ) ,,الخ
QUOTE
هي مو مساله محسوبه على جهه متفاءله او لا بس يعني الي يريد يشتغل ميبدي وهو محبط ويائس لان مراح يوصل لشي اصلا مراح يعرف شلون يشتغل اذا هو هيج ماعنده امل راح يكعد بس يندب حظه وهذا الي استهجنته من الشباب انو بس سب وشتم بالاوضاع واخيرا قررو الهروب
اذا ميبدي محبط ويائس يعني يبدي متفائل ,غير؟؟
والشباب شافو انهو ماكو جارة وتعبو لان ايد وحدة متصفك ,,, وبصراحة هو مو قرار هروب بكد ماهو قرار بحث عن حياة افضل وهذا من حق كل انسان
QUOTE
QUOTE تكدرون توضحولي شلون بالضبط جيلنا مو فاشل واحنا عدنا بالسادس اعدادي 40 يوم تحدد مصير الطالب الى حد ميموت؟؟ اربعين يوم بس !! يعني الطالب حتى لو فد مرة واكع وسختجي .... يحط خصوصي بالعطلة الصيفية ويتعب روحه بالاربعين يوم وصارت الطبية مضمونة ...زين شلون ينبني البلد اذا صار الكل يقدم على الطبية بمجرد انهو معدلة عالي
...
ليش العفو اني جنت دا ادافع عن نظام التدريس عدنا مو دا اكلك انت تقره البوستات بطريقه غريبه متصدكني هههههههه
اني مكلت انتي دتدافعين عن نظام التدريس بس اني جنت حاسبج وية كروب المتفائلين وهو اصلا مجان ببالي نظام التدريس الى حد ما قريت البوست مالتج مال (نظام التدريس بكليتنا),فكلت اسأل على السادس اعدادي بما انهو هو الموضوع عن الاجيال والسادس اعدادي يمثل نقطة تحول بجيلنا
وشغلة ثانية اني كتبت السؤال موجه لكل شخص يكول أنهو جيلنا مو فاشل ,,يعني مكان السؤال موجه الج بشكل خاص وأنما للكل
QUOTE
مديكل بوي لاتزعل علي ده امزح معك
ابدا د.بريشس ,, هي مجرد سوالف واني بصراحة يعجبني اشوف البقية شلون تفكر وشلون اكدر اطور نفسي فهيجي مواضيع حلوة خاصة من يكون بيها اختلاف وجهات النظر
تحياتي
realmadrid- 08-13-2008
QUOTE
احنا بلدنا وضعيتة مو طبيعية ابد لو جانت وضعيتة طبيعية و وجود الكفائات في الاماكن المناسبة و اكو خوف الله جان اتقدمنا مثل ما جنا بالسبعينيات اكثر بلد متطور بالشرق الاوسط و بالوطن العربي هم
اني وياك بهذا الرأي 100% , ماكو جيل فاشل و جيل ناجح اكو شيء اسمه وضع عام يخليك تكدر تبدع او يخليك ملتهي بالمشاكل ولحد يكلي احنا لازم نخلق هذا الوضع لان الشغله مو بيدنا احنا الشباب الشغله اكبر من هذا بهوايه
المشكلة اللي بينا انو احنا بداخلنا واغلبنا مو كلنا منريد نغير ...اذا شفنا شي غلط لو مشينا ويا..لو انهزمنا وعفنا بمكان منكول انو هالجيل فاشل ومابي خير و...و...و الخ ليش منحاول انو نصلحة؟ ماكو شي يصير بيوم وليلة لو كل واحد بينا حاول من يمة وبدا بنفسة جان انعدل الجيل...احنا نحجي واحنا اول الناس اللي دنخربط...يعني مثلا..نحجي على نظام التدريس مالتنا,هو اكو واحد بينا هسة مديعتمد عالمحاضرات المستنسخة ؟هية صارت شوية شوية الى ان اعتمدنا عليها اعتماد كلي بحيث تركنا الكتب...ودكاترتنا ديزودونا بيها مع الاسف...بالتالي تخرجنا واحنا كلشي منفتهم هاي تعتبر صوج منو؟
زين اللي ديحجي عالمجتمع ويكول متخلف وميفتهم وميصيرلة جارة...بمكان مينهزم ويعوفة هيج...ليش ميحاول يعدل الاشياء الي يشوفها غلط؟ هية مرح تتعدل راسا اكيد...بس لو اكو ناس تحاول جان صار براسنا خير...بس مشكلتنا انو بس بينا حجي وانتقادات وماكو واحد بينا يشتغل.. ترة الغرب مو احسن منا بس اشتغلو وتعبو الى ان صار براسهم خير...ليش احنا هم منسوي هيج؟احتمال احنا منرح نحس بالفرق بس اولادنا رح يحسو...مو احسن مما نترك كلشي ونظل بس نحجي؟
the bone collector- 09-09-2008
hello i agree with you but there must be hope cause we cant live with out it nothing stay as it was
honestman- 09-09-2008
احنا جيل فاشل شحن نيييييااااااااااااااااااااااااااااااااا!!!!!!!!!!!!!!!!!!!!!
nada.- 09-11-2008
QUOTE
هل حقاً نحن جيل فاشل ؟!!
اللي يتعب على نفسه ويطور بروحه ، يخلي هدف ويحققه ، يسعى لشي ويسويه ، يطور ويغير ويصنع انجاز اويسجل ابداع في اي نطاق او باي مجال وممكن ان يوصل مركز ينطي او يخوله قوة معينه اويمكنه ان يقدم شي للبشرية هذا تعريف الشخص او الناس الناجحة او علاقل مفهوم بسيط له والتعريف المعاكس ينطي مفهوم الفاشل منو ؟
اكيد اكو نسبية بالشغلة سواء بالمعايير اوبدرجات الفشل والنجاح وهذا هم يعتمد على الظروف وطبيعة فهم كل شخص او مجموعة للحياة واقتناعاتهم بيها ومن الاعتيادي انه اغلب حالات النجاح يكون الفشل سابقها او اصلا جزء لتحقيقها وتقديرها او ان يكون الشخص بنفس الوقت ناجح بشي وفاشل بشي ثاني وبالتالي نسب النجاح والفشل بشخصية كل فرد هي اللي تحدد اختلافاتن ا جيلنا او اي انسان هو ليحدد كونه ناجح او فاشل لكن طالما ظلينا على هلوضعية الكارثية شباب تائه ومحبط ، وكت مهدور بدون فائدة ، عجز وكسل ، خوف وتردد ، لا وعي ولا احساس بالمسؤولية ناس بالمكان الغلط والزين يمشي يم الحايط اذا مو بالحايط نفسه طالما ظلينا ماشين على اللي فتحنا عيننا و لكينا عليه اباءنا واجدادنا وظلينا بالعادات والتقاليد والقيم البدوية المتخلفة وعبالنا احنة فدشي ويطلع كل شي ماكو والناس وين سابقتنا! بس نهوس و مكانك راوح هذا اذا مو دنرجع ونرجع الباقين ليورة فاكييييييييييييييييييييييييد احنامو بس فاشلين وانما قمة الفشل
QUOTE
نسمعهم يتحسّرون على أيامهم الماضية
ويصفوننا ويصفون زماننا بأمور غريبة
فهل نظرتهم صحيحة أم أنها جائرة ؟؟ ولماذا ؟؟
وهل هم دوماً محقّين فيما يذهبون إليه ؟؟
حياتهم ابسط حياتنا اكثر تعقيد واكيد زماننا يختلف عن زمانهم مثل ما زمن اللي ورانه رح يكون مختلف عن زمننا وهمة يتحسرون لايام زمان لان ايام فاتت وراحت عاشوا بيها فترة من حياتهم وهسة يحنولها لان ذكرياتهم بيها
QUOTE
كانوا الناس إخوان وأحباب وكل شي كان له طعم
عن نفسي اشك بصحة هذا الكلام والا ليش وصلنا للوضع اللي احنة بيه !!!!
QUOTE
كثيراً ما نسمع نبرات الإحباط في مجالس الكبار ويرون أن هذا الجيل لا يصلح
لتحمل المسؤولية
وأن زماننا في كل أطرافه زمان لا يصلح للمعيشة وأنه زمن الإتكال على الغير
وإنتشار المحرمات وضيق العيش ... الخ
اكو مقولة عقلانية تكول
Those who criticize our generation forget who raised it
يعني همه هم جزء من الكارثة اللي احنة بيها مثل مااحنة باجر عكبة حنصير سبب بفشل اولادنا اذا بقينا على هلحال ! اومثل الاساتذة والدكاترة اللي يدرسون سواء رزل او مدح المهم يفيد الطلاب ويحاول يطلع منهم ناس ودكاترة زينة وتفتهم وبعدين على راحته يمدح او ينتقد
همة واحنة سواء الناجح والفاشل بيهم وبينا كلنا نتحمل مسؤولية الوضع اللي احنة بي واللي رح نكون بي
كل واحد بعد هو اللي يختار شيكون واللي بي خير هو اللي يبدي بروحه و يسوي اللي عليه و يحقق شي علاقل يكون حاول سواء علمستوى شخصي او على مستوى اكبر
Udaisa- 10-05-2008
مرحبا جميعا
اولا اعتذر انه دا اطلع دفاتر عتگ لأن الموضوع صارله تقريبا شهر ممضيوف عليه شي..بس اني هسة يالله شفته وقريته..وبصراحة الموضوع اكثر من حلو..وحتى بالبداية جنت دا اريد اخذ كووتس من حجيكم..بس بعدين شفت روحي حانزل كل حجيكم مرة ثانية..لأن كل بوست احلى من البوست الي قبله..فبرابس تو يو اول
اما بخصوص الموضوع الاساسي وهو"جيلنا وجيلهم"..فاني حاحاول ألخص الموضوع بأن أشبهه بمثال..اطلب منكم انه تحاولون تتخيلوه ويايه...تخيلوا انه احنا بعربة دتنزلق من منحدر من قمة جبل..واسفل المنحدر اكو هاوية...فبوكتهم جانت العربة بأعلى المنحدر..فلهذا ظاهر مجتمعهم وترابطهم ومستوى معيشتهم...الخ من كل هاي الامور الي ذكرتوهه تبين انه احسن من عدنا..اما بجيلنا فالعربة صارت بأسفل المنحدر...فلهذا يبين على جيلنا الفشل وما الى ذلك...ولهذا همه من يقارنون جيلهم بجيلنا يشوفون نفسهم احسن من عدنا..بس الحقيقة...لا همه كدروا يوكفون العربة عن الانحدار..ولا احنا كدرنا.....النظرة المتفائلة بالموضوع هيه انه العربة بعدهه موكعت بالهاوية..واحنا جيلنا بعده مانتهى دوره..بالعكس بعدنا بالبداية..اما جيلهم فراح وكته...فيبقى السؤال..هل حنگدر نوگف هاي العربة لو حنوگع كلنا بالهاوية؟؟؟
اما بخصوص مبدأ"سنفروا بحياتكم"(بالمناسبة..التسمية لطيفة ههههههههههه)...فاكو هواية انواع من الناس وميصير الواحد يجزم الحكم عليهم بأن يقسمهم الى مجموعتين(الذين سنفروا والذين لم يسنفروا بعد)...اني برأيي اكو ناس بقوا بداخل البلد مو لأجل الاصلاح ولا لأجل اي شي..وانما لأن مصارتلهم فرصة انه يطلعون..او طلعوا وتعكرت امورهم(وطبعا الناس الي جوي من برا للداخل..هذولة اعتقد الافضل انه استثنيهم من موضوعنا لأن بعدين ندخل بالسياسة)...واكو قسم ثاني بقى داخل البلد مو علمود اي شي بس لأجل الاصلاح...واني اعرف هواية ناس فرص ذهبية جتهم خارج العراق ومقبلوا يطلعون..مرادوا يديرون ظهرهم للواقع السيء وانما رادوا يحسنوه....وهذوله الناس ليهساعهم موجودين وظروفهم ووضعيتهم دتسمحلهم انه يقدمون..(مع انه الي ديقدموه هو شي بسيط امام الموجة العملاقة من التخريب الي ديتعرضلهه بلدنا..بس يبقون اصحاب فضل وهذا مينتقص من قيمة العمل الي ديقدموه)..القسم الثالث..همه الي جانوا بالقسم الثاني..بس ظروفهم تختلف عن الي بعدهم بالقسم الثاني...بحيث وصلوا لمرحلة بعد مديگدرون يقدمون ولا يأخرون...فصار بقاؤهم بالبلد مبيه اي معنى فطلعوا برا البلد...وعيونهم بعدهه تباوع ليورا...ينتظرون الظروف ترجع تصير بصالحهم ويكدرون يقدمون من جديد...اما القسم الرابع والاخير..فهمه الي من اول فرصة اجتله دار وجهه وطلع وبعد مسأل ولا عرف ولا اندل..فالقصد من هذا هو تعقيب على كلام البعض انه الي يريد يخدم بلده خل يبقى والي يريد يعيش حياة افضل خل يسنفر...لا مو بهالبساطة..اكو شغلة ثانية هم لازم واحد يشوفهه..هو يجوز يريد يخدم..بس الظروف متسمحله..فلازم يسأل نفسه سؤال ثاني..هل بإمكاني إني أخدم؟؟؟ لو طلعتي افضل؟؟
اما بخصوص المقترح الي تقدمت بيه بريشيس...فاني شخصيا يعجبني انه اشارك بهيج موضوع....بس مثل ما تعرفون من اصول الفورمز انه ميجي عضو جديد من اول يوم ويبدي يفتح توبيكس جديدة....هو اني صح مو عضو جديد...بس صارلي سنة ونص تارك الفورم(بسبب ظروف قاهرة لست بصددها الآن)..وهسة تقريبا نص الممبرز ما اعرفهم أصلا..فأتمنا انه واحد من زملائنا العتيگين يفتح توبيك بهالعنوان وانشالله منقصر بالمشاركة
بي أس...دا اشوف هواااية ناس تغيرت الغرووب مالتهم من ميديكال ستوودنتس الى كراجويتيد دكترز...بس ما ادري منوا لي تخرج هالسنة او السنة القبلههبس كلش فرحتلكم كلكم...مبروك التخرج جميعاً ولو متأخرة
Forumer™ is Voted #1 Free Forum Hosting provider
Build your own community today with the largest message board hosting company.
![smile.gif](http://4.<a href="http://www.forumer.com">forumer</a>.com/html/emoticons/smile.gif)
![biggrin.gif](http://4.<a href="http://www.forumer.com">forumer</a>.com/html/emoticons/biggrin.gif)
![wink.gif](http://4.<a href="http://www.forumer.com">forumer</a>.com/html/emoticons/wink.gif)
![laugh.gif](http://4.<a href="http://www.forumer.com">forumer</a>.com/html/emoticons/laugh.gif)
![sad.gif](http://4.<a href="http://www.forumer.com">forumer</a>.com/html/emoticons/sad.gif)